Surses: Igl cumegn d’urna dat gleisch verda alla realisaziun da plazzas da sport a La Nars

Las votantas ed igls votants digl cumegn da Surses on approvo alla votaziun all’urna igl credit da 4.5 miu. francs an favour digl project d’investiziun «plazzas da sport La Nars a Savognin”. Uscheia pò neir realiso igl project, tgi augmainta l’attractivitad digl cumegn scu li da veiver e da far vacanzas. En project per igl turissem, per las uniuns da sport localas e per la populaziun digl Surses.

Las votantas ed igs votants digl cumegn da Surses on decidia alla votaziun all’urna da dumengia cun 538 vouschs EA cunter 176 vouschs da conceder igl credit da 4.5 miu. francs per realisar igl poject, tgi prevei la construcziun d’ena ustareia e bietg da menaschi, treis plazzas da tennis novas, ena patinera mobila scu er en magasign. La participaziun è stada tar 38.78%.

Igl project è nia elaboro an strètga collaboraziun cun igl turissem, la scola da skis Savognin e las uniuns da sport localas. Chel project satisfò tant agls basigns d’utilisaders individuals, digls indigens e digls giasts, scu a chels dallas uniuns da sport localas. Ultra da pudeir eir cun patinas ins pò an futur er realisar gis da hockey scu er far turniers da curling e da tschoccas. L’utilisaziun multipla dalla patinera antras las uniuns da sport ed igls giasts individualas garantescha ena grond’occupaziun dalla purscheida e monta en augmaint dall’attractivitad per la regiun turistica.

Ossa stò neir inoltrada la dumonda da biagier correspondenta. Igl è previa da realisar igl project la stad/igl aton 2022, per tgi la patinera ed igl bietg da gastronomia e menaschi nov possan neir mess an funcziun gio igl anviern 2022/2023. La stad 2023 duessan esser fittadas las plazzas da tennis ed igl magasign.

Ulteriours infurmaziuns davart igl project: https://surses.ch/RM/actualitads/projects/lanars.html

 

Infurmaziuns:
Leo Thomann, mastral (e-mail: leo.thomann@surses.ch, telefonign 079 405 96 73)

  Mussar tot las novitads

Diese Seite verwendet Cookies. Erfahren Sie in unserer Datenschutzerklärung mehr darüber, wie wir Cookies einsetzen und wie Sie Ihre Einstellungen ändern können.