Cumpetenzas dalla suprastanza communala

La suprastanza communala ò tenor constituziun communala (art. 40) tottas cumpetenzas tgi n'èn betg surdadas ad en oter organ sen fundamaint digl dretg federal u cantunal, dalla constituziun u d'ena lescha communala.

Las sias cumpetenzas èn an spezial da:

1. exequeir las suandontas elecziuns:

a) digl vicemastral, tgi vign destino or digls quatter commembers da suprastanza communala;

b) digls commembers dalla cumischung da biagier;

c) dallas cumischungs stablas ed ad hoc tenor basigns;

d) digls delegos per corporaziuns ed associaziuns d’interess da dretg public u privat, allas qualas igl cumegn è par-   ticipo u ò en dretg da participaziun;

e) digls funcziunaris tg'igl cumegn ò da nominar a fundamaint digl dretg surordino;

f) digl persunal da cumegn, cun excepziun digl persunal da scola (art. 48 alinea 2 cefra 2 e 3);

2. exequeir igl dretg federal e cantunal scu er las leschas ed ordinaziuns communalas ed er igls conclus digl cumegn d'urna e dalla radunanza communala;

3. relascher las ordinaziuns executoricas tar las leschas communalas, an spezial en urden da gestiun ed en urden da persunal scu er las ordinaziuns davart las indemnisaziuns e la salarisaziun per persunal e commembers da cumischungs;

4. preparar tot las tractandas per mangs digl cumegn d’urna e dalla radunanza communala;

5. manar e survigilar l'antiera administraziun communala;

6. administrar la facultad communala;

7. far igl chint annual ed igl preventiv;

8. decider davart expensas anfignen fr. 400'000.00 per la madema tgossa ed anfignen fr. 80'000.00 schi sa tracta dad expensas tgi sa repetan mintg’onn. Per las expensas numnadas sot chella cefra vala ena limita maximala annuala da fr. 1'000'000.00;

9. decider davart cumprar, vender, barattar ed impinar bagns immobigliars u utilisaziuns conform alla lescha da construcziun scu er conceder u annullar oters dretgs reals limitos ainfer las cumpetenzas da finanzas tenor cefra 8 da chest artetgel;

10. cumprar bagns immobigliars per sierar reservas da taragn per pensums communals scu er per otras maseiras aint igl rom dalla politica da taragn e taragn da construcziun anfignen en import da maximal fr. 500'000.00;

11. […]

12. far contracts davart affars tgi èn ainten la cumpetenza dalla suprastanza communala;

13. decider arisguard igl manar process e recurs scu er far ancligientschas u contracts da cumpromiss;

13a.  decider davart recurs pertutgont conclus dalla direcziun;

14. exequeir la pussanza puliziala tgi surstat agl cumegn e la cumpetenza penala pertutgont la procedura penala administrativa;

Ultra da chegl ò la suprastanza communala la cumpetenza d’adattar igl dretg communal agl dretg surordino, schinavant tgi exista betg en spazi da regulaziun an chest risguard.