Savognin

Savognin è oz la pi gronda vischnanca da Surses e vala scu center economic e politic dalla val. Er igl center da sanadad cun spital e tgesa d'attempos sa catta a Savognin.

La curt da Savognin tutgiva prubablamaintg alla fundaziun dalla clostra Mistail. Igl onn 1154 è ella neida confidada alla clostra Son Luzi da Coira; chegl è er l'amprema menziun cun igl nom Sueningin. Igl onn 1487 è la baselgia da Son Martegn sa sparteida dalla baselgia principala da Riom; da lez taimp muntava en tal pass ena vasta separaziun politica e economica. Igl 17avel tschentaner èn neidas biageidas dus ulteriouras baselgias, chegl tgi era extraordinari per ena vischnanca da chella grondezza. Igl muteiv persiva è stada en'ampurmischung digls abitants igl onn 1629 da leir biagier baselgias schi cala la greva pesta.

L'anterioura structura decentrala digl abitadi n'è strousch ple visibla. Anfignen igls onns 1960 consisteva Savognin da tschintg gruppas d'abitadis tgi eran separadas cleramaintg: Son Mitgel, Naloz, Sot Curt, Sur Curt e Sur Tocf. Cun en concept turistic ins ò lia farmar la depopulaziun da lez taimp. Igl concept cumpigliva da stgaffeir ena zona da biagier da 80 hectaras e chegl ò mano ad en'activitad da construcziun exagerada. Igl onn 1975 ò la zona da biagier stuia neir redutgeida, chegl tgi è sto ena procedura fitg tgera pigl cumegn. Igl onn 1962 è neida fundada la Nandrò Ski- und Sessellifte Savognin-Piz Martegnas AG. Anc igl madem onn èn nias biagias treis runals. Set onns pi tard è neida erigeida la pi lunga telecabina digl mond da Savognin a Radons. Igl onn 1978 on las pendicularas da Savognin - scu amprema destinaziun d'anviern - fatg neiv artifiziala.