Per dominar situaziuns spezialas ed extraordinarias è igl stab directiv communal incumbenso tenor lescha davart la protecziun dalla populaziun da

• previgneir ed orientar la populaziun,
• proteger la populaziun, valours materialas ed igl ambiaint,
• minimar donns,
• refar schi spert scu pussebel la situaziun normala.

Evacuar la populaziun pertutgeida

Alarm d’ava

Igl «alarm d’ava» è en cumond d’evacuar immediat igl territori an prievel sot en meir da fermada. Igl «alarm d’ava» vign duvro angal an territoris periclitos sot en meir da fermada. Igl «alarm d’ava» sa furma da dodesch tungs bass, tgi cozzan mintgamai 20 secundas, an intervals da 10 secundas. Tunga igl «alarm d’ava», stò la populaziun

• bandunar immediat igl territori an prievel,
• suandar las reglas da figls d’infurmaziun e suandar igls cumonds dallas autoritdas.

Daple infurmaziuns cattez ainten igls downloads «territoris an prievel» e «spazis da spitgier sieirs» alla fegn da chel artetgel.

Alarm general

En tung da sirena tgi vo regularmaintg ad ot ed a bass è igl «alarm general». Chel tung d’avertimaint cozza tar sirenas staziunaras ena minuta e vign repetia ainfer tschintg minutas. Igl «alarm general» vign activo sch’igl è pussebel tgi la populaziun è an prievel. Chel tung annunztga directivas da cumportamaint u annunztgas uffizialas tgi vignan dadas ancunaschaintas antras igl radio.

Per la populaziun monta igl «alarm general»:

• tadlar radio e s’infurmar via Alertswiss,
• suandar igls cumonds dallas autoritads,
• infurmar las vaschignas ed ils vaschigns.

Sarvetsch communal d’infurmaziun per SMS

Mintga mument pò igl cumegn – u parts digl cumegn – esser an prievel da catastrofas u situaziuns d’urgenza da nateira, tecnicas u caschunadas dalla societad. Sche la populaziun è an tals cass concretamaintg an prievel, è igl post da communicaziun responsabel per igl alarm e la derasaziun da directivas da cumportamaint. Igl cumegn da Surses dovra per chel scopo scu instrumaint da communicaziun en sarvetsch da SMS gratuit per pudeir infurmar la populaziun an cass d’evenimaints cun cumonds da cumportamaint.

Igl sarvetsch funcziuna suandontamaintg:

Activar igl sarvetsch dad SMS

Tarmatte cun igl Voss telefonign alla nomra 076 601 22 55 igl text sequent:

• START 7453Surses

Deactivar igl sarvetsch dad SMS

Schi Vous lez deactivar igl sarvetsch d’infurmaziun gratuit, tarmatte alla nomra 076 601 22 55 igl text sequent:

• STOP 7453Surses

D’infurmar la populaziun an cass d’evenimaints cun cumonds ed instrucziuns da cumportamaint, è ena maseira d’urgenza. An cass d’evenimaints survignan las utilisadras ed igls utilisaders automaticamaintg en SMS.

Hotline per la populaziun

Situaziuns extraordinarias fon neir malsieir, perchegl ò la qualitad da communicaziun en’ota muntada durant las ampremas ouras ed igls amprems deis. Igl cumegn da Surses stò esser abel d’installar an terma da curt taimp en telefon da hotline per la populaziun e saveir cunsiglier. An cass d’evenimaints cun bleras dumondas dalla populaziun peglia persunal scolo ancunter igls telefons, infurmescha ed elavurescha immediat las infurmaziuns.

An cass d’evenimaints e tenor ordinaziun dallas autoritads vign installo en telefon da hotline: +41 81 659 11 72

Catastrofas ed evenimaints dalla nateira pon capitar da tot taimp cun en fitg curt resp. sainza taimp da preavertimaint.

An tals cass vign igl cumegn da Surses sustignia digl cantun e dispona da glistas da controlla e da modas da proceder an cass da crisa. L’attribuziun digls refugis vign communitgeida alla populaziun pir cura tgi la situaziun relevanta per la politica da siertad pretenda chegl. Per tot las abitantas ed igls abitants digl cumegn da Surses stat a disposiziun en refugi. L’attribuziun succeda dantant pir schi chegl vign decreto digl Uffezi da militer e protecziun civila ed alla basa dallas datas digls abitants actualas da chel taimp.

Igl concept «jodid da calium (distribuziun da tablettas da jod) è nia controllo ed actualiso digl cantun. Igl cumegn vign a distribueir chellas tablettas da jod alla populaziun pir sen decret dallas instanzas cantunalas. Pigl cass d’evenimaint ò la suprastanza defino schinumnos “lis logistics da distribuziun” ainten las singulas vischnancas an Surses. Chels lis servan per distribueir products resp. per garanteir la communicaziun cun la populaziun an cass da catastrofas u da crisas.

Cun simplas maseiras e cun igl dretg sa cuntigneir ègl pussebel da redutgier la dimensiun da donns, p.ex. tar mancanza d’electricitad. Infurmaziuns davart maseiras da preparaziun e da cumportamaint tar crisas èn da cattar sot https://www.alert.swiss/.

Pondere tar las Vossas preparativas tgi sa tracta d’ena situaziun excepziunala, ainten la quala la limitaziun da donns ò amprema prioritad. Cunzont la periclitaziun da persungas ègl dad impedeir. Perchegl ègl impurtant da metter las dretgas prioritads.

Pondere perchegl

• scu tgi Vous savez far en past tgod sainza current,
• scu tgi Vous savez garanteir l’illuminaziun necessaria,
• scu tgi Vous savez tadlar las novitads las pi impurtantas,
• scu tgi Vous savez scaldar aglmanc ena tgombra an Voss tigneirtgesa sainza current,
• scu tgi Vous savez tigneir an funcziun indrezs, apparats e sistems an cass d’interrupziun digl current (p.ex. apparats medicinals scu apparats da far dialisas, indrezs d’alarm, pompas, portas-garascha, etc.)

Malgro las preparaziuns dalla branscha d’electricitad e dallas maseiras statalas ègl ainten l’atgna responsabladad ed aint igl interess da mintga singula persungas da proveder da moda adquata per situaziuns da crisa.

Igl cumegn da Surses ò installo scu med da communicaziun en sarvetsch d’infurmaziun gratuit per SMS, per saveir infurmar la populaziun da moda sperta an cass d’evenimaints.