Igl svilup digl li sa fatschainta digl svilup digl spazi da veiver an Surses – per Surses scu li d’abitar, economic e turistic. An chella funcziun s’occupescha igl svilup digl li digl portfolio strategic digl project e magna independentamaintg, u accumpogna e sustigna projects prioritaris dalla destinaziun. Igl maletg directiv «Surses 2030» serva per instrumaint impurtant digl management e dallas decisiuns. Ulteriouras infurmaziuns davart dallas lavours (da project) digl svilup digl li vasez pi angiu.

Ulteriouramaintg surpeglia igl svilup digl li la «perspectiva d’evla» per novs temas. Chegl vot deir, tg’igl svilup digl li sa detta fadeia da rimnar referenzas, da stgaffeir ena reit da contacts cun persungas digl fatg regiunalas e naziunalas an spezial cun cumegns muntagnards, da demussar bungs exaimpels no dalla practica e da metter a disposiziun alla suprastanza communala basas da decisiun pigl adiever da chels temas. Varsaquants exaimpels èn spazi d’abitar disponibel per indigens, mancanza da persunal qualifitgia e «New Work», electromobilitad e participaziun.  

Igl svilup digl li agescha scu post da stab an senn da cunsegliaziun e sustign per la suprastanza e direcziun communala. La partiziun dispona igl mument d’ena plazza da 100%, reparteida sen dus persungas. 

Netzer Linda: manadra

Contact:

tel.: +41 76 553 13 57
e-mail: linda.netzer@surses.ch

Projects tgi vignan elaboros actualmaintg digl svilup digl li:

• Plan strategic bike 2.0 cun focus sen la planisaziun d’adiever bike / viandar, novs projects da construcziun trail da Parnoz, trail digl Gelgia ed igl trail da Somtgant
• Participaziun dalla giuventetna / UNICEF «cumegn bagnvulent anvers unfants»
• DigiTAl / SmartVillages
• Campadi*
• Model futuristic Beiva*
• Register dallas sagondas abitaziuns*
• Cooperaziun ainten la cumischung per la revisiun dalla planisaziun digl li
• Cooperaziun per igl PRE-project da products regiunals digl Parc (gruppa da lavour logistica e vendita)

*L’elaboraziun dallas paginas-web cun infurmaziuns detagledas davart igl tema suonda pi spert pussebel.