Sur

Sur è situo en po dalla vart dalla Veia digl Gelgia sen ena costa exponeida vers sid. Sur la vischnanca è la culegna Tgacrest, sot vischnanca Furnatsch.

La depopulaziun siva dalla sagonda ghera mundiala è marcanta. Sulettamaintg durant l'erecziun digl rampar digl lai da Marmorera igls onns 1950 è igl domber d'abitants carschia per en curt taimp sen radond 200 persungas.

Sen ca. 2000 meters sur mar schea l'Alp Flex. La planeira s'extenda sen bunamaintg tschintg kilometers an direcziun nord-sid e dus kilometers an direcziun ost-vest. L'Alp Flex era en abitadi classic digls Gualsers. I vign supponia tgi la colonisaziun vegia gia li la mesadad digl 14avel tschentaner e tg'igls colonists seian viandos d'Avras sur igl Stallerberg sen l'Alp Flex. Gio ainten la mesadad digl 17avel tschentaner è la populaziun sa sminueida marcantamaintg, prubablamaintg perveia d'ena epidemia dalla pesta. Alla fegn digl madem tschentaner ins ò do se la colonisaziun stabla ed igls Gualsers èn ias a star ainten la vischnanca da Sur ed on uscheia er surpiglia igl lungatg rumantsch. L'Alp Flex è ena cuntrada da pale da muntada naziunala e posseda ena varietad da speztgas remarcabla. Oz vign l'Alp Flex utilisada per l'agricultura e pigl turissem. Remarcabla è er la tgaplotta da Son Roc.