FAQ pertutgont taxas dad ovras

Tenor la lescha davart las finanzas digl cantun Grischun e l'ordinaziun da finanzas accumpagnonta èn igls cumegns obliias, da pretender taxas tgi corvan igls costs e tgi correspondan agl causader, per curveir las expensas dalla construcziun, digl menaschi, digl mantignamaint e dalla renovaziun dad indrezs da provedimaint d'ava e dismessa dad ava persa publics, scu er per l'administraziun digl rusment da vischnancas. Chellas taxas èn parteidas se an ena taxa fundamentala ed ena taxa tenor quantitad. La relaziun egna tar l'otra stò muntar, tenor decisiun dalla dertgira federala, a min. 50% tar 50% resp. max. 75% tar 25%. Igl cumegn da Surses ò fixo la relaziun sen 60% (taxa fundamentala) tar 40% (taxa tenor quantitad).

Da paer angal la taxa da quantitad è ord chel muteiv betg lubia. L'infrastructura è messa or sen ena occupaziun cumplagna digls schaschants. Abitaziuns e tgesas, tgi nissan betg duvradas u angal fitg darar, vessan uscheia da paer navot, schibagn tgi er chels objects procuran per costs da mantignamaint.

Decisiv per la taxaziun dallas taxas fundamentalas è mintgamai la valeta da nov digl bietg tenor la davosa stema uffiziala.

La taxa tenor quantitad per ava ed ava persa vign calculada tenor igl consum dall'ava (hidrometer).

La taxa tenor quantitad per la dismessa da rusment vign indemnisada cun igls satgs da rusment sottamess a taxas.

La taxa fundamentala vign chintada per mintga singul object sen igl taragn attatgea (tot igls bietgs sen igl taragn attatgea) e tar l'ava persa per tot igls singuls objects attatgeas. La taxa fundamentala vign pretandeida, pi spert tgi en object è utilisabel, independent schi el vign er propi duvro u betg. Agl aspect digl consum e dalla dirada digl adiever vign tignia chint cun igl incassamaint dalla taxa tenor quantitad.

Tenor art. 28 dalla lescha dall'economia da rusment èn da paer taxas tgi sa repetan mintg'onn per bietgs tgi cuntignan abitaziuns, lis da vacanzas e lavour u menaschis da producziun u er tigls quals i sa resulta regularmaintg rusment. En clavo/uigl è da prancepi en li da lavour u en menaschi da producziun. Er schi el vign betg duvro ple per igl sies scopo uriund dall'agricultura, so igl object tuttegna neir nizigia. Tar en'utilisaziun d'en clavo/uigl niss genero rusment. La taxa fundamentala vign debitada, pi spert tgi en object è utilisabel, independent schi el vign propi nizigia u betg. Agl aspect digl consum e dalla dirada digl adiever vign tignia chint cun igl incassamaint dalla taxa tenor quantitad.

Per tot igls bietgs abitabels e menaschis è necessari en tschert andomber da plazzas da deposit. Chellas son neir nizigeidas scu parcadi u er per construeir ena garascha. Garaschas vignan damai vurdadas scu ena part digl abitadi u digl menaschi. Conform all'egualitad vignan chintadas er garaschas construeidas separadamaintg. Tar bietgs, tgi disponan d'ena garascha integrada, è chella chintada ainten la valeta da nov digl bietg. La taxa fundamentala vign debitada, pi spert tgi en object è utilisabel, independent schi el vign propi nizigia u betg. Agl aspect digl consum e dalla dirada digl adiever vign tignia chint cun igl incassamaint dalla taxa tenor quantitad.