Salouf
Igl nom dalla vischnanca da Salouf dereiva digl cavalier Salugo, tgi vign numno igl onn 1160 scu administratour d'ena gronda curt episcopala.
Anfignen igl onn 1943 niva duvro uffizialmaintg igl nom tudestg Salux. La culegna sarada è situada digl mang sanester dalla val Surses sen en'otezza sur mar da var 1250 m. Sen la veia vers Mon sa catta la pitschna culegna Del e sot la vischnanca la curt Mulegn. La voba consista da treis steilas ed ena gelgia d'argient tgi ranviescha alla famiglia Fontana. Da chella famiglia dereiva igl erox grischun Banadetg Fontana.
Salouf posseda blers bagns culturals. Tgesas imposantas ed ornadas per part cun sgrafit, furman igl maletg dalla vischnanca. En'attracziun è er igl pastregl tgi datescha digl 18avel tschentaner e tgi è nia renovo da nov. Igl mulegn vigl digl onn 1877 è anc mantignia bagn e vala scu egn digls mulegns da grang tgi èn stos an funcziun igl pi dei, numnadamaintg anfignen la mesadad digls onns 1990. La baselgia da Son Gieri è neida biageida anturn igl 1500. Igl altar grond tgi datescha digl taimp anturn 1515 è remarcabel. Sot Salouf, sen igl intschess Flecs, sa catta ena fundareia da fier. Mademamaintg segl territori da Salouf schea Ziteil sen 2429 m s.m., igl pi ot li da pelegrinadi d'Europa.