Cultura an Surses
Tge capeta?
Exposiziuns, museums, musica, litteratura, teater e solt. La tradiziun culturala e la diversitad on influenzo gio da vigl annò la nossa val e dattan ena taimpra speziala alla veta.
Giovanni Segantini
Igl artist Giovanni Segantini, tgi è naschia igl 1858 ad Arco (Trentino) agl nord digl Lai da Garda, ò visito l'academia d'art Brera a Milang, ò vivia sessour ainten la Brianza ed è sa retratg igl 1886 an Svizra. Igl amprem è el sa caso cun sia famiglia a Savognin.
Museum Regiunal Savognin
Chella tgesa è perdetga dalla nossa veta terrestra. Ainten las sias miraglias on igls noss antenats vivia e luvro. La veta da chel taimp è stada fitg povra, ma plagn speranza. An respect anvers chel taimp darvignsa isch e porta.
Origen
Origen - punt retorumantscha tranter nord e sid
Igl nom Origen è rumantsch e monta derivanza, provignientscha, creaziun –
correspondentamaintg è igl program digl festival en confess alla forza culturala d'ena regiun trilinga, tgi veiva digl barat.
L'instituziun culturala Origen realisescha mintg'onn igl «Origen Festival Cultural» aint igl Grischun e sa deditgescha an spezial alla promoziun e producziun da teater da musica nov e professiunal. Origen ò en'atgna tgesa: igl casti da Riom è nia biagia or e davert igl 2006 per producziuns da teater. Origen n'è betg en ghetto alpin d'en lungatg muribund, mabagn ena perdetga d'ena cuminanza linguistica viveida, tgi risca adegna puspe da nov igl experimaint «cultura».
Spassegio cultural tras Savognin
Igl Spassegio cultural tras vischnanca Az magna sper 11 tavlas d'infurmaziun ve, noua tgi èn documentos evenimaints istorics e fatgs culturals interessants dalla vischnanca da Savognin. Uscheia pudez amprender daple davart Giovanni Segantini, la situaziun da traffic d'antrouras a Savognin e diversas perdetgas dall'istorgia, tgi èn da vaseir anc oz an vischnanca.
Ainten la broschura cattez infurmaziuns pertutgont tot las tavlas d'infurmaziun per rumantsch, tudestg, taliang ed engles. Integrada è er ena carta cun igls lis dallas singulas tavlas. La broschura ins pò retrer digital sot igl link giusot u tigl biro turistic, tar l'administraziun communala a Tinizong scu er ainten diversas buteias ed ustareias.
Nous Az giavischagn bler divertimaint da scuvreir la noss'istorgia.