Mulegns

Mulegns schea ainten la strètga dalla val, noua tgi conflueschan igl Ual da Faller e la Gelgia. La vischnanca è situada sen en'otezza da stgers 1500 meters sur mar. La Veia digl Gelgia sa squitscha tras las retschas da tgesas.

Mulegns era dasperas Curvalda e Casti igl terz li, noua tgi nivan midos igls tgavals. Anfignen 150 tgavals cattavan plaz ainten las grondas stallas. Igl marcant Hotel Liun anmez vischnanca stat anc oz scu monumaint pigls taimps dallas carotschas da posta, tgi èn gio dadei passos. Siva dall'avertura dalla lengia da veiadafier Alvra on pers igls ples digls abitants da Mulegns lour basa d'existenza; chel fatg ò er gia consequenzas pigl domber d'abitants. Anturn igl 1900 abitavan ca. 150 persungas a Mulegns, oz èn chegl damanc tgi 30.  

La baselgia baroca da Son Francestg datescha digl onn 1643. Perveia da diversas arsas da vischnanca existan strousch ple actas istoricas agls Mulegns. I vign supponia tg'igl nom Mulegns dereiva d'en travagl da Mulegn agl Ual da Faller. La voba cuntigna ena roda-mulegn neira sur ondas blavas tgi simboliseschan igl Ual da Faller. Anfignen igl onn 1943 niva duvrada uffizialmaintg la versiun tudestga Mühlen. Igl anteriour cumegn da Mulegns è nia fundo digls Gualsers aint igl 15avel tschentaner ed igl 1521 vign Mulegns menziuno per l'amprema geda. Igl center uriund dalla colonisaziun era dantant ainten la Val Faller. Lò niva exploto arom da ca. 600 anfignen 500 avant Cristus ed i dava furns da livantar. Igls Gualsers eran colonisos lò gio aint igl 13avel tschentaner. Scu possess episcopal è Faller numno per l'amprema geda igl 1315.