Istorgia

Surses è en cumegn politic ainten la regiun Alvra digl cantun Grischun ainten Svizra.  El è nia fundo igl 1. da schaner 2016 antras la fusiun digls cumegns politics Salouf, Riom-Parsonz, Cunter, Savognin, Tinizong-Rona, Mulegns, Sur, Marmorera e Bivio. Siva Scuol e Zernez è el igl cumegn igl terz grond aint igl Grischun, chegl tgi pertotga la surfatscha ed igl quart grond siva Glarus Süd dalla Svizra.

Igl cumegn da Surses cun radond 2'500 abitant:as sa cumpona dallas 11 vischnancas Beiva, Cunter, Marmorera, Mulegns, Parsonz, Riom, Rona, Salouf, Savognin, Sur e Tinizong. Cun ena surfatscha da radond 325 km² totga Surses tar egn digls pi gronds cumegns dalla Svizra. Mintga singula dallas sias vischnancas ò en agen caracter, seigl chegl perveia digl maletg dalla cuntrada, l'economia, l'istorgia e la cultura. Las 11 vischnancas furman en cumegn fitg interessant, retg da belezzas naturalas, prezious bietgs istorics ed ena bunga infrastructura.

Igl lungatg uffizial ed igl lungatg da scola è retorumantsch. Perchegl succedan las infurmaziuns uffizialas an rumantsch (surmiran) ed er las radunanzas communalas vignan fatgas an lungatg rumantsch. Igl lungatg eredito da Beiva è igl lungatg taliang. Perchegl vignigl communitgia an taliang cun la populaziun da Beiva, tenor giaveisch e pussebladad. An consequenza da bler:as nov:as resident:as dad otras cuminanzas linguisticas vignan messas a disposiziun las communicaziuns uffizialas digl cumegn per regla e schi pussebel er an tudestg. Uscheia vignan utilisos uffizialmaintg e regularmaintg tots treis lungatgs ainten l'administraziun.