Cunter

La vischnanca da Cunter (an tudestg Conters im Oberhalbstein, anfignen igl onn 1943) schea dalla vart dretga dalla val sen ena otezza sur mar da stgers 1200 m ve dalla Veia digl Gelgia.  

Siva digls onns 1960 ò la vischnanca - tgi era uriundamaintg purila - pudia profitar digl svilup turistic a Savognin. Uscheia è igl domber d'abitants sa dublo digl nivel igl pi bass igl onn 1960 a radond 250 persungas igl onn 2013. Tar la vischnanca da Cunter totga er la culegna da Burvagn, tgi è situada agl nord dalla vischnanca. L'amprema menziun datescha digl onn 1370 scu Contra.

Perveia dallas arsas dalla vischnanca igls onns 1754, 1812, 1824 e 1896 n'è strousch ple avantmang substanza architectonica uriunda. Aintamez vischnanca stat la baselgia baroca da Son Carlo Borromäus digl onn 1677. Igl patrung-baselgia figurescha er ainten la voba digl cumegn. Uriundamaintg tutgiva Cunter cun Riom. La separaziun politica ed economica ò cuzzo daple tgi treis tschentaners. Uscheia èn igls gôts nias repartias pir igl onn 1903. Da gronda impurtanza è la scuverta d'en scazi a Burvagn igl onn 1786. Parts da chel èn conservos aint igl museum Retic a Coira ed aint igl museum naziunal a Turitg.