Igl onn 2023 è igl cumegn da Surses nia undro cun igl label "Cumegn amei digls unfants" da l'UNICEF.

La fegnameira digl cumegn da Surses è da lascher participar igls unfants e giuvenils an chels fatgs tgi pertotgan els e da dar ena vousch ad els. Els duessan pudeir far valeir, sviluppar e realisar lour ideias e basigns ed uscheia furmar activamaintg lour avigneir.

UNICEF Svizra e Liechtenstein premieschan cumegns tgi migliureschan sistematicamaintg lour bagnvuglientscha anvers unfants ed obtignan resultats visibels per unfants e giuvenils.  

La basa d'ager digl cumegn per migliurar l'attractivitad pigls unfants è igl plan da maseiras elaboro cun tschintg temas centrals (plan da maseiras cumplet):

1. Instituziunalisaziun da dretgs digl unfant e da giuvenils
2. Francar igls dretgs digl unfant e da giuvenils scu er la partizipaziun digls giuvenils aint igl menaschi da scola
3. Stabileir la reit Next Gen (giuvenils da 16 – 25 onns)
4. Prevenziun/sensibilisaziun & meis digls dretgs digl unfant igl november
5. Taimp liber/sport/vacanzas

Il matg 2025 ò gia li en discurs intermediar cun represchentaziun da l’UNICEF. Igl discurs ò do l’occasiun da vurdar anavos sen la lavour digls davos dus onns e da far en'amprema bilantscha intermediara. Da vart da l’UNICEF è nia attesto agl cumegn da Surses en grond angaschamaint per realisar igl plan da maseiras (v. downloads).

Commembers dalla cumischung:
Daniel Spadin, co-direcziun dalla scola
Irina Mehrfeld, lavour sociala da scola
Thomas (Frodo) Eigensatz, represchentaziun da genitours
Adrian Ballat, lavour da giuvenils represchentaziun communala

An vista alla realisaziun dalla participaziun da giuvenils èn nias fundos igl 2021 igls cunsegls d’unfants «cunsegl d’unfants Grava» cun represchentants dallas classas dalla scoletta anfignen tar la 4. classa primara, scu er igl «cunsegl gioven» cun represchentants dalla 5. classa primara anfignen tar la 3. classa digl scalem superiour.

Da mintga classa fon part mintgamai dus scolar:as agl cunsegl da scolar:as correspondent.

Igls cunsegls sa radungan eneda pro quartal. Irina Merfeld, luvranta sociala da scola ed  Adrian Ballat, assistent da giuvenils, coordineschan las scuntradas cun igls cunsegls da scolar:as. Avant e siva las scuntradas discuteschan igls commembers digls cunsegls da scolar:as mintgamai ainten lour classas igls temas ed igls projects.

Durant la fasa da reconstrucziun dalla tgesa da scola Grava e la sparteida spaziala èn represchentos da nov aint igl "cunsegl d'unfants Grava" la 1. anfignen la 3. classa primara ed aint igl "cunsegl gioven" la 4. classa primara anfignen la 3. superioura.