Administraziun communala

L'administraziun communala cumpeglia tot igls sectours digl cumegn politic da Surses ed è l'organisaziun administrativa tgi realisescha igls fatgs communals. Ella è sottamessa administrativamaintg direct agl mastral ed indirect alla suprastanza communala.

La direcziun operativa dall'administraziun communala vign garanteida antras igl scrivant communal, resp. igl manader operativ dall'administraziun, scu tgi chella funcziun vign numnada da nov.

L'administraziun communala exequescha las funcziuns tgi vignan surdadas ad ella antras decrets communals e decisiuns communalas. Ella tgira l'antiera contabilitad scu er igls ulteriours pensums publics dall'administraziun e digls sarvetschs tecnics. Ella exequescha las decisiuns ed ordinaziuns dalla suprastanza communala, schinavant tgi vignan betg incumbensos oters organs u terzas persungas, e realisescha tot las lavours surdadas dalla suprastanza communala u dalla direcziun communala tenor lour directivas.