Bivio

Bivio, la vischnanca da pass (rumantsch Beiva), schea sen en'otezza da stgers 1800 meters sur mar ve dalla Veia digl Gelgia. Igl nom Bivio signifitgescha spartaveias e sa referescha alla situaziun dalla vischnanca agl pe digl Pass digl Gelgia e digl Pass digl Set. Gio aint igl urbari digls bagns imperials anturn igl 840 siva Cristus è Beiva nia numno scu li da cutier per viagiatours. Sper la vischnanca principala existan anc quatter curts.

Beiva è nia coloniso per part dalla Bergiaglia. Igls abitants da lungatg taliang vevan veivs contacts cun Avras da lungatg tudestg, cun igls vaschigns rumantschs dalla val angiu e sur igl Gelgia cun la Nagiadegna. Beiva valeva perchegl per en fitg lung taimp scu la suletta vischnanca trilinga. Er davart la baselgia ò Beiva ena posiziun speziala; uscheia vala la vischnanca siva dalla refurmaziun scu paritetica. Chegl sa mossa er ve digls bietgs sacrals ainten vischnanca: la baselgia catolica da Son Giagl dereiva digl onn 1518 ed ò en altar gotic relevant; la baselgia refurmada è neida biageida igl onn 1675.

Ainten la Leia dalla Tgade furmavan Stalla (Beiva e Marmorera) ansemen cun Avras la dertgira Avras-Stalla ed ansemen cun la dertgiera lontana ainten la Nagiadegna bassa Ramosch la dertgira ota Ramosch-Stalla-Avras. Perveia dallas grondas distanzas e dallas differenzas linguisticas eran chellas structuras fitg stentousas.

All'antschatta digl 20avel tschentaner on blers Bivians catto lavour ainten la Nagiadegna, noua tg'igl turissem prosperava. Igl onn 1959 è nia biagia igl amprem runal a Beiva. Cugl success digl turissem ègl reuschia da stgaffeir daple plazzas da lavour ainten l'economia da construcziun ed aint igl sectour terziar.

Igl onn 1980 dumbrava la vischnanca 237 abitantas ed abitants. Siva da lò è sa sminuia igl andomber ed è crudo igl onn 2013 sot 200 persungas.