Riom-Parsonz

Cumegn da Parsonz

Igl anteriour cumegn da Riom-Parsonz è sa furmo igl 1. da schaner 1979 or dalla fusiun digls anteriours cumegns Riom e Parsonz. La voba mossa igl marcant casti Rätia Ampla tgi è visibel gliunsch anturn. Tottas dus vischnancas èn situadas dalla vart sanestra dalla Val Surses, Riom sen radond 1250 m sur mar e Parsonz bung 100 m pi ot.

Ainten la mesadad digls onns 1970 ins ò catto a Riom restanzas da miraglias romanas. Egn digls bietgs veva dimensiuns imposantas da 20 sen 30 meters ed ins suppona tgi chel bietg sarviva scu mutatio, damai scu albiert da cutier cun stallas per suldos e viagiatours. Chesta pensiun era situada sen la ruta digls pass digl Gelgia e da Set. Aint igl urbari digls bagns imperials curretic anturn igl 840 è Riom numno scu bagn roial cun ena baselgia. Tgunsch era chella l'amprema dalla val. 

Da chel taimp cumpara per l'amprema geda igl nom Villa Riamio. Pi tard ins catta igl nom Ryams scu li dalla dertgira Surses. Parsonz vign numno l'amprema geda igl onn 1156 scu Coloniam de Presam. Riom era anfignen aint igl 19avel tschentaner igl center politic e giudizial dalla val. Chegl sa mossa er ve digl casti imposant tgi è ia an possess digl uestg da Coira igl 1258 ansemen cun tot igl schaschant local.

Igl onn 1864 è sto en incendi sgarschevel a Riom tgi ò devasto prest l'antiera vischnanca. L'arsa digl 1913 è alloura stada manc desastrousa. A Parsonz ègl ars igl onn 1949, nov tgesas e clavos èn davantos unfrendas dallas flommas.

La tgesa Sontga Crousch è situada marcantamaintg agl our vers nord dalla vischnanca da Riom. La tgesa è neida erigeida curt siva la gronda arsa igl 1867 da Lurintg Maria Carisch, tgi era turno da Paris puspe ainten la sia patria scu om retg. Igl onn 1930 è igl bagn nia vandia allas mongias da Menzingen. Siva digl 2011 appartignan tgesa, clavadeira e curtegn alla fundaziun Origen tgi ò an senn d'installar a Riom igl center cultural cun salvs d'exposiziun, salvs da prova, luvratoris, administraziun ed oter ple. Ainten la clavadeira ò igl festival installo en'infrastructura tgi lubescha producziuns e represchentaziuns sur igl antier onn.

Diese Seite verwendet Cookies. Erfahren Sie in unserer Datenschutzerklärung mehr darüber, wie wir Cookies einsetzen und wie Sie Ihre Einstellungen ändern können.