Igl cumegn da Surses vign undro scu amprem cumegn grischun cun igl label dall’ UNICEF «cumegn amei digls unfants». 

An en process durant ples onns ed an strètga collaboraziun cun l’associaziun tetgala cantunala jugend.gr, è igl cumegn da Surses sa fatschanto cun igls temas promoziun, participaziun e dretgs dalla giuventetna e digls unfants. Igl è sa resulto en plan da   maseiras cun tschintg temas centrals (varda downloads). Chel ò an meira da dar ena vousch agls unfants ed agls giuvenils, d’augmentar lour autoefficaziadad e d’igls lascher sa participar allas fatschentas tg’igls pertotgan. Ampremas maseiras èn gio pigleidas per mangs, scu la stgaffiziun da cunsegls d’unfants ainten scola u la realisaziun participativa digl pumptrack. Ulteriouras maseiras vignan a suandar.  

L’UNICEF Svizra e Liechtenstein premiescha cumegns tgi migliureschan sistematicamaintg lour bagnvuglientscha anvers unfants ed obtignan resultats visibels per unfants e giuvenils.  L’ UNICEF Svizra e Liechtenstein onorescha las stentas digl cumegn da Surses e surdat igl label «cumegn amei digls unfants» per l’amprema geda ad en cumegn grischun.

L’iniziativa «cumegn amei digls unfants» sa basa sen l’iniziativa internaziunala UNICEF «Child Friendly Cities». Ella promova intenziuno process per augmentar l’amicabladad per unfants ed accumpogna cumegns, da fixar practic scu er strategic la convenziun per dretgs d’unfants.

Aint igl rom dall’iniziativa realiseschan cumegns participos igls suandonts zaps, per survagneir igl label da process «cumegn amei digls unfants»:

• Definiziun dall'atgna posiziun (vista dalla intanza e digls carschias)
• Workshops cun unfants e giuvenils (vista digls unfants)
• Plan d’acziun
• De d’evaluaziun (vista externa) 

UNICEF cumegns amei digls unfants

La fegnameira digl cumegn da Surses è da lascher participar igls unfants e giuvenils an dumondas tgi pertotgan els e d’igls dar ena vousch. Els duessan pudeir dar impuls, sviluppar e realisar lour ideias e basigns e furmar uscheia activamaintg lour avigneir.

Igl project „cumegn bagnvulent anvers unfants“ corresponda allas fegnameiras digl maletg directiv Surses 2030 per daple cogestiun e participaziun davart dalla populaziun. Igl plan da maseiras elaboro sa basa sen las ancunaschientschas dall’analisa digl li antras l’UNICEF scu er sen igls giaveischs e las ideias da scolaras e scolars. Las maseiras duessan ossa neir pigleidas per mangs activamaintg igls onns 2023 anfignen 2026. 

NOUS.TOTS.ANSEMEN.

Per la realisaziun dalla participaziun da giuvenils ò igl cunsegl da scola do gleisch verda igl schaner per fundar igls cunsegls da scolars. Naschias èn igl «cunsegl d’unfants Grava» cun represchentants da classa dalla scoligna anfignen la 4. classa primara, scu er igl «cunsegl gioven» cun represchentants dalla 5avla classa primara anfignen la terza superioura.

Igls inscunters digls cunsegls da scolars on li eneda agl meis. Frodo (Thomas Eigensatz), luvrant da giuvenils, coordinescha igls inscunters. Siva digl inscunter digls cunsegls da scolars infurmeschan igls commembers digls cunsegls da scolars mintgamai puspe la classa sen igls temas e projects discutòs.