Project tgesa da scola Grava

La tgesa da scola Grava, Savognin, è neida construeida igl onn 1954. Siva d’alloura èn adegna angal neidas realisadas las renovaziuns ed investiziuns las pi basignevlas. Angal tar la scoligna ègl do avant 8 onns renovaziuns pi grondas, cunchegl tgi siva dalla decisiun positiva digl suveran sursetter per la fusiun dalla scola igl onn 2013 èn tot igls unfants da scoligna da nov a Savognin. Per tgi er tot las scolaras ed igls scolars dalla 1. – 4. classa primara da Surses (lez mument anc sainza Beiva) vegian plaz ainten la scola Grava, vignan las scolaras dalla la 5. e 6. classa primara a parteir digl 2014 instruias alla scola Barnagn.

Alla scola Grava dattigl gio da blers onns en grond basigns da sanaziun ed amplificaziun. Chegl era en tema permanent gio tar igl cumegn da Savognin. Tar igl cumegn da Savognin ins leva pero betg preceder, mabagn spitgier la votaziun dalla fusiun dallas scolas, e pir alloura piglier an mang igl project digl stabilimaint da scola. Tgi dovra per tot las scolaras ed igls scolars da Surses daple spazi da scola e tgi igl plan d’instrucziun 21 e novas furmas da scola on basigns da stanzas da scola pi grondas era gio dad onns en fatg indiscutabel per tots participos.

Perchegl planisescha igl cumegn da Surses en nov implant da scola. Persiva ins ò incumbenso igl biro d’architectura Anaïs cun l’examinaziun e la cumparegliaziun digls dus lis da scola pussebels: Grava (tgesa da scola existenta) e Bursa (nov li da scola). Siva d'ena evaluaziun manedla dallas dus variantas è la radunanza communala sa decideida per la varianta dad ena midada ed amplificaziun dalla tgesa da scola existenta a Grava.

Siva da chesta decisiun ò la suprastanza communala do an incumbensa ena concurrenza da project tgi vign er manada digl biro d’architectura Anaïs. A madem mument è er nia defino igl program da spazi, uscheia tgi igls biros d’architectura participos on savia scumanzar cun lour lavour. Igls 5 e 6 da matg 2022 è la giuria alloura sa decideida pigl project victour. Igl è stada ena decisiun clera ed unanima.

Ossa less igl cumegn render public alla populaziun igls resultats dalla concurrenza e preschentar igl project victour, scu er igls ulteriours nov projects inoltros. Chegl succeda aint igl rom d’ena exposiziun, tgi ò li durant quatter deis, u detg oter sur dus fegns d’emdas. L’antiera populaziun è anvidada cordialmaintg. Igl experts digl fatg ed igls giurors tgi èn sa participos agl project vignan ad esser preschaints igl antier taimp e dar sclarimaint agls visitaders interessos. 

Organisaziun durant la fasa da construcziun

Essend tgi la radunanza communala è sa decideida per igl project dalla tgesa da scola Grava ègl betg pussebel d'instrueir durant la fasa da construcziun an tgesa da scola Grava. Per chest muteiv s’occupa actualmaintg igl cunsegl da scola Surses intensivamaintg cun la dumonda d'en provisori da scola durant igl taimp da construcziun da prevedibel dus onns. Cò on anc da neir fatgas diversas examinaziuns. Alla finala vign ad esser impurtant tgi vignan risguardos igls suandonts aspects

  • Corresponda igl provisori allas preteisas actualas da scola
  • Tgenegns digls bietgs existents èn adattos persiva
  • Scu ins so realisar tiers igl provisori la meisa da mezde e las structuras digl de
  • Scu sa laschan organisar igls transports digls scolars uscheia tgi gl’è surpurtabel pigls unfants ed igls costs restan ainten en rom ruschanevel

Igl èn er gio neidas fundadas cumischungs e subcumischungs correspondentas per igl accumpognamaint digl antier project. Igl uffezi da biagier davainta magnaproject, dantant tgi igl biro Anaïs cun Nina Bühlmann collaborescha scu cunsiglieder da proprietari.

La subcumischung, tgi corva igls aspects digl menaschi da scola, vign a collaborar strètg cugl magnaproject. 

Per tot las dumondas an connex cugl project stat igl magnaproject gugent a disposiziun:

simon.bergamin@surses.ch

Diese Seite verwendet Cookies. Erfahren Sie in unserer Datenschutzerklärung mehr darüber, wie wir Cookies einsetzen und wie Sie Ihre Einstellungen ändern können.