Igl label «Schweizer Holz» per dus projects da punts aint igl cumegn da Surses

Igl cumegn da Surses è nia undro cun igl label «Schweizer Holz» per dus digls sies projects da punts. La rancunaschientscha pertotga la construcziun nova dalla punt da lenn a Tinizong, scu er la sanaziun dalla Punt Mulegn a Parsonz.

Igl label conferma tgi la lenna duvrada dereiva da gôts svizzers cultivos a moda persistenta e tgi l’elaboraziun scu er la creaziun da valour seian succedeidas ainten Svizra. Aint igl cass concret è neida fabritgeida l’antiera construcziun da travs ed er la tavladeira da tottas dus punts or da lenn grischun regiunal.

Dus projects – en cler mussamaint d’attaschedadad alla persistenza
A Tinizong è neida construeida ena nova punt da lenn. Ella serva scu colliaziun permanenta per traffic, agricultura e selvicultura ed è neida realisada cumplettamaintg cun lenna digl Grischun.

La Punt Mulegn a Parsonz è neida sanada cun gronda precauziun. Elemaints purtonts existents scu igls pilasters on savia neir mantignias. Antras la renovaziun sistematica èn neidas spargnedas resursas e la dirada da veta dalla punt è neida prolungada cleramaintg.

Ve da tots dus projects èn stadas participadas las interpresas suandontas:
• UFFER Holz AG, Savognin
• Resurses SA, rezgia ed elaboraziun da lenna
• Fanzun AG, Coira
• Widmer Ingenieure AG, Tinizong
• Ingenieurbüro Walter Bieler AG, Bonaduz
• Battaglia Bau AG, Savognin
• Mettler Prader AG, Cunter

Cun la decisiun intenziunada per lenna grischuna e per partenaris innovativs locals rinforza igl cumegn da Surses la creaziun da valour regiunala e presta ena contribuziun persistenta agl svilup dalla val.

Ulteriouras infurmaziuns:
• Zwei Brücken – ein starkes Zeichen für Schweizer Holz (UFFER Holz AG):
https://www.uffer.swiss/news/zwei-brucken---ein-starkes-zeichen-fur-schweizer-holz
• Das Label «Schweizer Holz»:
https://graubuendenholz.ch/schweizer-holz-3/