Igl cantun Grischun ed igl cumegn da Surses sustignan la fundaziun d’ena societad da project communabla
La regenza approvescha la fundaziun d’ena societad da project communabla per la renovaziun dalla concessiun/igl nov concessiunamaint dall’ovra electrica Tinizong tranter igl cumegn da Surses ed igl cantun an furma d’ena societad anonima. La «Ovras Electricas Tinizong SA» vign fundada cun en capital d’aczias da 100'000 francs. Igl cumegn ed igl cantun vignan a sa participar mez a mez. La suprastanza communala Surses ò do igl consentimaint alla fundaziun dalla societad da project igls 19 da matg 2025. Agl cunsegl administrativ dalla «Ovras Electricas Tinizong SA» vignan a far part mintgamai en commember digl cantun e digl cumegn, scu er en terz commember. L’organisaziun da project è oss incumbensada da far avanzar spertamaintg igls proxims pass digl process digl return agl proprietari dallas concessiuns existentas digl dretg dallas avas per las ovras electricas Tinizong e Nandro. La societad da project so neir inoltrada pi tard ainten la societad futura dall’ovra partenaria (structura da participaziun) per l’ovra electrica Tinizong. La fundaziun planisada da chellas structuras communablas mossa tg’igl cumegn ed igl cantun – tgi on igl dretg da scadenza - èn fermamaintg decidias da piglier per mangs igls proxims pass communablamaintg ed a moda coordinada.
Siva digl 1955 utilisescha l’ovra electrica digl martgea da Turitg (ewz) la forza hidraulica dalla Gelgia e dallas avas lateralas aint igl implant electric Tinizong per produtgier electricitad. Igls dretgs existents d’utilisaziun dall’ava termineschan igls 31 da matg 2035.
La suprastanza communala Surses ò approvo la fundaziun dalla societad da project «Ovras Electricas Tinizong SA», sa basond agl conclus dalla radunanza communala digls 7 da november 2023 resp. dalla votaziun all’urna digls 21 da schaner 2024. Lò èn neidas pigleidas las decisiuns suandontas:
- Deliberar la dumonda digl ewz digls 24 d’avregl 2020 per renovar la concessiun existenta per mangs digl cumegn d’urna, cun la proposta da negar la dumonda e communitgier alla petenta tg’igl cumegn da Surses na seia betg pront da renovar la concessiun existenta.
- Sa basond a chel conclus vign la suprastanza communala incumbensada da realisar tot las maseiras an vista all’utilisaziun futura antras igl cumegn ed igl cantun. I sa tracta dall’utilisaziun dallas avas gio utilisadas oz aint igls implants electrics existents. Chellas maseiras èn an spezial:
- preparar las basas da concessiun per l’utilisaziun futura antras igl nov concessiunar;
- evaluar la structura da participaziun futura, incl. la realisaziun;
- exequeir e realisar igl return agl proprietari.