Infurmaziun publica davart igl concept da traffic aint igl territori Grava a Savognin

An connex cun la construcziun nova dalla tgesa da scola primara Grava a Savognin ègl previa d'introdueir en nov concept da traffic aint igl territori Grava per augmentar la siertad per las scolaras e per igls scolars e per chietar igl traffic an general.

Igl concept è nia elaboro cun igl sustign digl biro d'inschignier e da planisaziun Hartmann & Monsch a Parpan.

Considerond l'impurtanza da chest concept da traffic organisescha la suprastanza communala ena seira d'infurmaziun per preschentar las maseiras planisadas alla populaziun.

L'infurmaziun cun l'exposiziun da documaints e plans ò li glindesde, igls 23 da zarcladour 2025, dallas 19.00 allas 21.00, ainten la sala dalla Scola da skis Savognin.

Agl senn d'ena consultaziun vign do alla populaziun durant en termin da 30 deis siva la seira d'infurmaziun (24 da zarcladour anfignen e cun igls 25 da fanadour 2025) la pussebladad d'inoltrar alla suprastanza an scretg propostas e giaveischs mutivos an connex cun igl concept da traffic.

Anvidada è l'antiera populaziun digl cumegn da Surses scu er ulteriouras persungas interessadas. Las abitantas ed igls abitants da Savognin, scu persungas pertutgeidas directamaintg, survignan anc en'invitaziun separada per la seira d'infurmaziun.

Nous supplitgagn da piglier cunaschientscha e speragn sen ena numerousa participaziun.

Tinizong, igls 17 da zarcladour 2025, Suprastanza communala Surses