Immobiglia Scalotta a Murmarera

La suprastanza communala ò survagnia cunaschientscha avant en taimp tg’igl cantun Grischun vigna a piglier a tschains l'immobiglia Scalotta a Marmorera per alloschar persungas digl sectour d'asil. Igl uffezi da migraziun e da dretg civil magna actualmaintg albierts collectivs an 17 lis, aint igls quals vignan alloschadas actualmaintg circa 1'200 requirents e requirentas d’asil, persungas admessas provisoricamaintg e, siva dalla premaveira 2022, er persungas tgi on basigns da protecziun dall'Ucraina. Igl termin davent da cura tg’igl albiert per gruppas Scalotta vign nizigia per tal scopo n'è betg anc defino. L’antschatta dall’utilisaziun dapenda d'ena vart dalla realisaziun resp. dalla terminaziun dallas lavours da renovaziun necessarias. La dimensiun ed igl coz d'en’utilisaziun futura digl albiert dapendan ultra da chegl digl ulteriour svilup digls muvimaints da migraziun dall'Ucraina scu er dallas differentas regiuns d'origin digl sectour d'asil regular durant igls proxims meis.

La locaziun a media vista tras igl cantun vign realisada da vart digl cantun per garanteir las capacitads d’albiert, e chegl cun l'intenziun da pudeir evitar per gronda part ena repartiziun da chestas gruppas da persungas sen igls cumegns grischuns. An cas tgi l'utilisaziun digl albiert sa mossa, vign igl gestiunari digl albiert an consultaziun cun igls responsabels digl cumegn ad organisar en’occurrenza d’infurmaziun per abitantas ed abitants scu er per ulteriouras persungas interessadas.