Premi scu Top Performer per Surses sen Crossiety
Nous ischan Top Performer!
Chesta premaveira festivescha la plazza da vischnanca digitala Surses sen Crossiety tschintg onns. Aint igl frataimp èn annunztgeidas sen la plattafurma ple tgi 1500 persungas. Mintga meis vignan vetiers an media 15 – 20 novas utilisadras e novs utilisaders. Per meis vignan scretgas ca. 150 contribuziuns.
Chest onn ò Crossiety valeto las 110 plazzas da vischnanca digitalas an Svizra. Els on giuditgia la cuverta da tot igls abitants, l’activitad scu er igl cuntign tgi vign partia sen la plazza da vischnanca digitala. La nossa plazza da vischnanca digitala Surses è neida undrada scu Top Performer 2023. Sper igl cumegn da Surses èn nias premiias er igls cumegns dad Engelberg e Mellikon scu Top Performer.
Chel premi ans fò grond plascheir. Igl maret totga betg sulettamaintg agl cumegn u ad Anavant Surses, mabagn a UNS ALLEN GEMEINSAM – NOUS TOTS ANSEMEN – NOI TUTTI INSIEME. Persiva lainsa angraztger.
I monta, tgi la cuminanza funcziunescha. Dumondas vignan fatgas sen la plazza da vischnanca digitala e savens vignan ellas er raspundeidas. Impressaris e purtaders da prestaziun nizegian la plattafurma per inserats u publicaziuns da plazzas libras. I dat er discussiuns politicas, tgi vignan manadas cun respect, er tar meinis differents. Gruppas d’interess sa cattan.
Igl success dalla plattafurma ans fò grond plascheir e dat curasch da manar anavant ella e la nizigier scu canal da communicaziun.
Pigl avigneir ans vainsa mess fegnameiras concretas:
- Sen la plattafurma duessan aveir li pi savens retschertgas e discussiuns.
- Contribuziuns duessan neir commentadas pi savens.
- La plazza da vischnanca digitala duess esser ena contribuziun preziousa per la democrazeia tgi funcziunescha.
An chel senn lainsa dar curasch da duvrar venavant activ la plattafurma, ed eventual ancurascher cumarats e paraints da far igl madem.
Tar dumondas tar la plattafurma digitala pudez gugent ans contactar.
Adrian Ballat, suprastanza cumegn Surses
Giani Spinatsch, substitut scrivant da cumegn
Sen tschintg ulteriours onns plaschevels scu cuminanza tgi funcziunescha
Cumegn da Surses ansemen cun l’uniun Anavant Surses