Da dar a fit l’Alp Prà Miez a Marmorera

Igl cumegn da Surses dat a fit a parteir digl 2024 l’alp Prà Miez a Marmorera.

S’annunztgier pon corporaziuns da dretg public existentas cun sedia an Surses u persungas privatas u gruppas da persungas. Tgi tgi è interesso da piglier a fit l’alp, ò d’inoltrar la sia annunztga ansemen cun igl concept da menaschi anfignen igl pi tard igls 29 da favrer 2024 agl cumegn. Per cass tgi dat ples annunztgas vign l’alp dada a fit – sot resalva tg’igl concept da menaschi seia adatto per la cultivaziun dall’alp - tenor la lescha d’alps, pastgiras e prada digl cumegn da Surses (art. 11 ed art. 13) tgi è an vigour siva digls 26-06-2023, tenor la rangaziun suandonta:

Corporaziuns da dretg public existentas cun sedia an Surses
possessours d’animals tgi anverneschan lour animals surtot cun pavel digl agen travagl ed on igl li da menaschi ainten chella vischnanca, noua tgi l’alp u la pastgira correspondenta sa catta;
possessours d’animals tgi anverneschan lour animals surtot cun pavel digl agen travagl ed on igl li da menaschi aint igl cumegn da Surses;
ulteriours possessours d’animals tgi on igl li da menaschi ordvart igl cumegn da Surses.

L’annunztga d’interess incl. concept da menaschi ò da neir inoltro all’adressa suandonta:

Cumegn da Surses
Partiziun Construcziun|Energeia|Ovras
Signour Gianes Netzer
Veia Cantunala 57
7453 Tinizong

u per e-mail a gianes.netzer@surses.ch

Per dumondas stat a disposiziun Irene Kolb, parsoura departamaint d’agricultura
(irene.kolb@surses.ch).

Tinizong, igls 16 da schaner 2024                               Suprastanza communala Surses