La radunanza communala ò approvo dus credits e delibero la revisisun parziala dalla planisaziun locala «Parnoztrail».

Credit per reactivar la regiun alluvieida dall’Alp Curtegns

Cun gronda pluralitad ò igl suveran approvo igl credit net da CHF 761'000.00 per reactivar la regiun alluvieida dall’Alp Curtegns a Radons. Igl perimeter da project cumpeglia ena lunghezza da canal dall’Ava da Nandro da radond 2'000 m aint igl territori dalla regiun alluvieidia dall’Alp Curtegns, tgi è d’impurtanza naziunala. Siva da precipitaziuns ins ò stuia intervigneir igls davos onns adegna puspe cun maschinas ainten la regiun alluvieida. Ossa duess neir mess a disposiziun all’Ava da Nandro puspe la grondezza uriunda dalla regiun alluvieida. Igls costs totals per realisar igl project montan a radond 2.3 miu. francs. Cantun e confederaziun sa participeschan cun 62% e la Corporaziun d’alp Val Nandro cun 5% agls costs da construcziun. Las lavours vignan exequeidas sur ena perioda da 3 onns.

Ulteriouras decisiuns

Sainza discussiun ò la radunanza communala approvo igl credit d’impegn da CHF 430'000.00 per sanar la plazza davant igl local da pumpiers e davant la basa digl Uffezi da construcziun bassa (district 7) ainten la zona d’industreia Gravas a Cunter. Las parcellas èn an proprietad digl cumegn, tgi dat a tschains igls locals.

Cun gronda pluralitad è neida deliberada er la revisiun parziala dalla planisaziun locala «Parnoztrail» per mangs dall’exposiziun da recurs publica e siva per l’approvaziun antras la regenza. La revisiun parziala è necessaria per realisar la senda da velos da muntogna per famiglias e principants da Parnoz a Savognin. Igl è planiso da realisar igl project la stad/aton 2024.