La concessiun digl ewz per las ovras electricas Tinizong e Nandro na duess betg neir renovada

La radunanza communala Surses ò nego la dumonda digl ewz da renovar la concessiun digl dretg dallas avas existenta per las ovras electricas da Tinizong e Nandro, tgi scada igl 2035. Ossa stò decider anc igl cumegn d’urna Surses an tgossa.

Sen proposta dalla suprastanza e dalla «cumischung da scadenza», tgi è neida installada aposta per la dumonda dalla scadenza digls implants a Tinizong e Nandro, ò la radunanza communala nego cun gronda pluralitad la dumonda digl ewz (Ovra electrica digl martgea da Turitg) da renovar la concessiun digl dretg dallas avas existenta. La Regenza grischuna ò sustignia la proposta dalla suprastanza e dalla cumischung da scadenza ed ò recumando an en screiver agl cumegn da negar la dumonda digl ewz. La concessiun digl dretg dallas avas existenta an favour digl ewz scada igl 2035.

Cun chella decisiun negativa sa resalva igl cumegn igl dretg da pudeir decider libramaintg a tge partenari tg’el vot dar ena nova concessiun. La suprastanza communala e la cumischung da scadenza vottan tigneir avert cotras tot las opziuns d’ager. Igls ulteriours sclarimaints vign igl cumegn a far ansemen cun la cumischung da scadenza, alla basa dalla strategia cantunala davart la forza hidraulica. I vign preciso tgi chella decisiun è betg drizzada cunter igl ewz, ma tgi ella duess garanteir agl cumegn la cumplagna libertad da decider. Ena collaboraziun cun igl ewz è da prancepi pussebla er venavant.

Igls 21 da schaner 2024 vignan las votantas ed igls votants digl cumegn da Surses a decider all’urna da moda finala davart la dumonda digl ewz da renovar la concessiun existenta. Tar chella decisiun da prancepi na vogl betg anc per l’execuziun effectiva digl return agl proprietari.