Igl cumegn d’urna approvescha la revisiun parziala dalla constituziun communala
La cuminanza dallas votantas e digls votants all’urna digl cumegn da Surses ò approvo la revisiun parziala dalla constituziun communala. La revisiun parziala è davantada necessaria an consequenza dalla revisiun totala dalla lescha digls cumegns digl cantun Grischun tgi è eida an vigour igl 1. da fanadour 2018 e dall’experientscha fatga durant set onns scu cumegn fusiuno. Igl èn er neidas examinadas las structuras politicas digl cumegn e neidas adattadas, noua tg’era necessari.
Las votantas ed igls votants digl cumegn da Surses on a caschung dalla votaziun all’urna da dumengia approvo la revisiun parziala dalla constituziun communala cun 295 vouschs ancunter 109 vouschs.
Ultra dallas adattaziuns basignevlas agl dretg surordino e da differentas precisiuns an consequenza dallas experientschas fatgas siva dalla fusiun da cumegn igl onn 2016, ègl nia decidia d’introdueir igl referendum da finanzas facultativ. Pinavant vignan augmentadas tranter oter las cumpetenzas dalla cumischung da biagier. La structura d’organisaziun actuala cun la radunanza communala ed igl cumegn d’urna, scu er igl model dalla direcziun communala vignan loancunter mantignias sainza midadas.
Cun l’approvaziun dalla revisiun parziala antras igl cumegn d’urna da Surses stò ossa neir dumandada l’approvaziun formala antras la regenza grischuna. Siva dall’approvaziun correspondenta antras la regenza vo la revisiun parziala dalla constituziun communala an vigour.
La participaziun alla votaziun è stada 22.06%
_____________________________