Elecziuns communalas 2023
Tenor art. 12 dalla constituziun communala on li las elecziuns ordinarias per installar las novas instanzas communalas ainten la sagonda mesadad digl onn.
La suprastanza ò fixo igls termins suandonts per las elecziuns communalas digl 2023:
- scrutini: dumengia, igls 20 d’avost 2023
- scrutini: dumengia, igl 26 da november 2023
D’eliger èn igls suandonts commembers resp. las suandontas commembras dallas autoritads per la perioda d’uffezi da quatter onns (2024 - 2027)
- igl mastral resp. la mastrala
- dus commembers resp. dus commembras dalla suprastanza
- igls quatter commembers resp. las quatter commembras digl cunsegl da scola
- igls treis commembers resp. las treis commembras dalla cumischung da gestiun
Igls suandonts titulars d’en uffezi on do ancunaschaint lour demissiun e stattan cotras betg ple a disposiziun per en’ulterioura candidatura:
- mastral: Leo Thomann
- suprastanza communala: Giancarlo Torriani, commember
- cunsegl da scola: Adrian Demarmels, commember
- cumischung da gestiun: Urs Guetg, president
Igls ulteriours titulars resp. las ulteriouras titularas actualmaintg an uffezi stattan a disposiziun per l’elecziun per en’ulterioura perdioda d’uffezi.
Per las elecziuns vala la procedura stipulada ainten la lescha da votaziuns e d’elecziuns digl cumegn da Surses (art. 12 ss). Las propostas electoralas pigl amprem scrutini ston neir surdadas an scretg anfignen igl pi tard gievgia, igls 20 da fanadour 2023, allas 17.30, tar l’administraziun communala a Tinizong (u agl canzlist ni agl spurtegl digls sarvetschs d’abitants). Propostas tgi aintran pi tard n’èn betg valevlas.
Ena proposta electorala na dastga betg cuntigneir daple candidats resp. candidatas tgi posts libers.
Igls formulars per far propostas electoralas pon neir retratgs a parteir d’immediat agl spurtegl digls sarvetschs d’abitants tar l’administraziun communala a Tinizong u neir
cargeas giu dalla pagina d’internet www.surses.ch (categoria: politica&administraziun > cumegn d’urna > elecziuns communalas).
Propostas electoralas fatgas pigl amprem scrutini valan er per igl sagond scrutini, schinavant tg’igl candidat resp. la candidata na reteira betg sia candidatura. Pertutgont las propostas electoralas per igl sagond scrutini valan las mademas determinaziuns conformas agl amprem scrutini.
Las persungas cun dretg da votar survignan igl material da votar (glistas cun igls noms digls candidats resp. dallas candidatas tgi èn proponeidas per l’elecziun ed igls cedels da votar) aglmanc 14 deis avant la votaziun all’urna.
La constituziun communala e la lescha da votaziuns e d’elecziuns pon neir retratgas tar la canzleia communala u neir cargedas giu dalla pagina d’internet www.surses.ch (categoria: politica&administraziun > leschas).
Nous supplitgagn da piglier cunaschientscha.
Tinizong, igls 25 da matg 2023 La suprastanza communala Surses