L’indemnisaziun dallas autoritads e cumischungs vign adattada
La radunanza communala digls 24 d’avregl ò approvo la revisiun totala dalla lescha d’indemnisaziun per las commembras ed igls commembers dallas autoritads e cumischungs digl cumegn da Surses. Pianvant ò igl suveran delibero la revisiun parziala dalla constituziun communala per mangs dalla votaziun all’urna e concedia en credit supplementar an connex cun la renovaziun digl Punt Mulegn a Parsonz.
Cun gronda pluralitad ò la radunanza communala digl cumegn da Surses approvo la revisiun totala dalla lescha d’indemnisaziun per las commembras ed igls commembers dallas autoritads e cumischungs cun antrada an vigour igl 1. da schaner 2024. Las midadas principalas cumpeglian l’adattaziun dall’indemnisaziun annuala e la fixaziun digl pensum dalla suprastanza communala. Alla basa dallas experientschas fatgas siva dalla fusiun igl 2016 vign igl pensum dalla suprastanza communala fixo sen total 180%. Da chel vign igl pensum digl mastral resp. dalla mastrala fixo sen aglmanc 70% e maximalmaintg 100%. Igls quatter ulteriours commembers da suprastanza partan igl rest digl pensum d’aglmanc 80% tranter pêr, per regla a mademas parts. Ultra da chegl vign er augmentada l’indemnisaziun per igl presidi tenor igl maximum dalla classa da salarisaziun 21 dalla lescha da persunal digl cantun Grischun e tenor igl maximum dalla classa da salarisaziun 17 per igls ulteriours quatter commembers da suprastanza. Per minimar igl risc digl mastral resp. dalla mastrala an cass d’ena nunreelecziun prevei la lescha da nov da far ena “sieranza da nunreelecziun”.
La revisiun totala dalla lescha ins ò fatg an vista allas elecziuns communalas igl avost. Cun l’adattaziun dall’indemnisaziun duess neir fatga la carica d’en uffezi communal schi attractiva scu pussebel.
Revisiun parziala dalla constituziun communala
Cun gronda pluralitad ò la radunanza communala delibero la revisiun parziala dalla constituziun communala per mangs dalla votaziun all’urna cun la proposta d’approvar la revisiun e da la metter an vigour. Ultra dallas adattaziuns necessarias agl dretg superiour e diversas precisaziuns fatgas siva dalla fusiun ègl previa da nov d’introdueir en referendum da finanzas facultativ. Er las cumpetenzas dalla cumischung da biagier vignan schlargedas. La structura d’organisaziun actuala cun radunanza communala e cumegn d’urna scu er cun igl model da direcziun duess perancunter neir mantigneida sainza midadas. La revisiun parziala vign sottamessa agl cumegn d’urna igl zarcladour 2023 per l’approvaziun.
Approvaziun d’en credit supplementar
Sainza cuntervousch ò la radunanza communala approvo en credit supplementar da CHF 560’000.00 per la renovaziun digl Punt Mulegn a Parsonz. Gio igls 7 da december ò la radunanza communala gia concedia igl credit brut da CHF 800’000.00 per la realisaziun digl project. Perveia dalla carascheia ed oters muteivs ègl sto necessari da dumandar en credit supplementar. Cantun e confederaziun sustignan igl project cun contribuziund da radond CHF 890’000.00.
Tinizong, igls 25 d’avregl 2023