Igl cumegn da Surses è igl amprem «cumegn bagnvulent anvers unfants» aint igl Grischun
Igl cumegn da Surses vign undro scu amprem cumegn grischun cun igl label dad UNICEF «cumegn bagnvulent anvers unfants».
An en process durant ples onns ed an strètga collaboraziun cun l’associaziun tetgala cantunala jugend.gr è sa fatschanto igl cumegn da Surses cun igls temas promoziun, participaziun e dretgs dalla giuventetna e digls unfants. Igl è naschia en plan da maseiras. Chel ò an meira da dar ena vousch agls unfants ed agls giuvenils, d’augmentar lour autoefficaziadad e d’igls lascher sa participar allas fatschentas tgi pertotgan els. Ampremas maseiras èn gio pigleidas per mangs, scu la stgaffiziun da cunsegls d’unfants ainten scola u la realisaziun participativa digl pumptrack. Ulteriouras maseiras vignan a suandar.
Chellas stentas èn neidas onoradas ossa: UNICEF Svizra e Liechtenstein premiescha cumegns tgi migliureschan sistematicamaintg lour bagnvuglientscha anvers unfants ed obtignan resultats visibels per unfants e giuvenils. Per l’amprema geda surdat UNICEF Svizra e Liechtenstein ossa igl label «cumegn bagnvulent anvers unfants» ad en cumegn grischun. Giancarlo Torriani, igl schef digl departamaint scolaziun digl cumegn da Surses, dei an chel connex: «Chella distincziun ans fò grond plascheir ed ans mutivescha. Nous lagn ans angascher per igls noss unfants, per giovnas e giovens. Ellas ed els èn igl noss futur. Igl label è la paia per la lavour prestada anfignen ossa ed a madem taimp l’obligaziun da persequitar la veia pigleida. I dat da far anc bler!»
Er jugend.gr ò plascheir dalla distincziun. Chantal Bleiker, la manadra da project jugend.gr s’exprima: «La surdada digl label agl cumegn da Surses mossa tg’igl noss project ‘Participaziun digls unfants e digls giuvenils aint igls cumegns grischuns’ fò effect. Nous gratulagn allas persungas pertutgeidas e sustignign igl cumegn cun las sias intenziuns, uscheia tgi gartegia da crear communablamaintg igl avigneir.»
UNICEF Svizra e Liechtenstein surdat igl label agl cumegn da Surses igls 31 da matg 2023 a caschung d’ena festa publica.
Ulteriouras infurmaziuns dat Linda Netzer, manadra digl svilup digl li (Tel. 076 553 13 57)
Tinizong, igls 30 da mars 2023