Surses: Igl cumegn da Surses scumonda dad arder fis artifizials
La radunanza communala digls 27 da mars ò approvo la lescha davart igl adiever da fis artifizials. Cun chella vign scumando dad arder fis artifizials segl territori digl cumegn da Surses. Pinavant èn nias concedias dus credits per projects d’investiziun ed ins ò decidia da prolungar en contract d’amprest an favour dalla Pendicularas Savognin SA per en onn.
A parteir dad ossa ègl scumando dad arder objects pirotecnics (fis artifizials) sen igl territori digl cumegn da Surses. La radunanza communala ò approvo ena lescha correspondenta, chegl siva d’aveir stritgia sen proposta d’en votant igl artetgel, tgi vess lubia alla suprastanza da conceder lubientschas excepziunalas per occurrenzas spezialas. Exclus digl scumond èn fis artifizials tgi on nigns effects da canera, scu p.ex. fis artifizials da meisa, sbrenzlas, fis bengals, vulcans, etc. La suprastanza ò elaboro la lescha scu cunterproposta ad en’iniziativa tgi era neida inoltrada igl onn passo, cugl scopo da relascher en scumond general da tot igls fis artifizials. Igls amprems sotsignias dall’iniziativa on alloura retratg l’iniziativa, siva tgi la suprastanza veva elaboro e preschento ad els la lescha davart igl adiever digls fis artifizials.
Approvaziun da dus credits
Cun angal ena cuntervousch ò la radunanza communala approvo en credit d’impegn da net CHF 750’000.00 per l’equipaziun digl Gôt Grond tranter Tinizong e Rona. Igl project prevei da biagier tar la rezgia a Tinizong ena punt nova sur la Gelgia e davent da lò ena veia da 1.6 km anfignen tar l’anterioura rezgia da Savognin. Igls costs totals per chel project, tgi vign realiso an dus etappas, montan a 3.25 miu. francs. Confederaziun e cantun sa participeschan cun radond 77% ve digls costs, uscheia tgi resta en import net da CHF 750’000.00 per igl cumegn.
Ultra da chegl è nia approvo en credit da CHF 240’000.00 per ramplazzar la centrala termoelectrica tar la serenera a Cunter. Igl indredz actual è vigl e caschunga adegna puspe reparaturas pi grondas.
Ulteriouras decisiuns
La radunanza communala ò decidia unanimamaintg da prolungar igl contract d’amprest existent da 2 miu. francs an favour dalla Pendicularas Savognin SA, anfignen la fegn digl 2023. Chel amprest era nia concedia per la construcziun dalla telecabina da Savognin a Tigignas e vess gia da neir restituia anfignen la fegn digl onn passo. Sen dumonda dallas pendicularas è igl contract nia prolungo per en onn. Pigl amprest on las pendicularas da paer pigl onn current en tschains da 2%.
Sainza discussiun ò la radunanza communala er approvo da separar ena surfatscha parziala da 632 m2 dalla parcella cun dretg da biagier nr. 5450 ainten la zona d’industreia Gravas a Cunter e da fusiunar chella surfatscha cun la parcella cun dretg da biagier nr. 5452.
Tinizong, igls 28 da mars 2023