Obligaziun da lubientscha per schliesas a motor / vehichels a tschinta

An vista agl anviern tgi vign renda la suprastanza communala attent tgi tenor art. 78 dall’ordinaziun federala davart las reglas da traffic sen veia ORT pon vehichels excepziunals (scu p.ex. schliesas a motor / vehichels a tschinta) carar sen veias publicas angal cun ena lubientscha an scretg.

Tot las manaschunzas e tot igls manaschunz da schliesas a motor / vehichels a tschinta on da dumandar all’administraziun communala ena lubientscha correspondenta. Igl formular da dumonda necessari «Antrag um Erteilung einer Sonderbewilligung für Raupenfahrzeuge» digl Uffezi per igl traffic sen veia digl Grischun è disponibel sen www.surses.ch (rubrica: politica&administraziun > formulars&downloads) u pò neir retratg tar l’administraziun communala a Tinizong. Alla dumonda è d’agiuntar en extract d’ena carta topografica cun purto aint igl tschancung dalla veia.

Per conceder las lubientschas sa basa igl cumegn sen la legislaziun e la practica digls cumegns uriunds, considerond tgi dat betg anc ena lescha harmonisada per igl cumegn da Surses. L’elaboraziun d’en tal reglamaint è preveida. Per tala raschung vala la lubientscha communala angal per la staschung d’anviern 2022/23. Tenor la legislaziun vertenta digls cumegns uriunds da Cunter, Marmorera e Tinizong-Rona na vignan concedeidas nignas lubientscha per schliesas a motor / vehichels a tschinta pigls territoris da chels cumegns uriunds.

Las dumondas pon neir inoltradas per e-mail a info@surses.ch u per posta all’administraziun communala, sarvetschs d’abitants, Veia Cantunala 57, 7453 Tinizong. Per dumondas stattan a disposiziun las collaboratouras digls sarvetschs d’abitants (telefon 081 659 11 60).

Surpassamaints cunter la ORT vignan punias dalla pulizeia cantunala. La suprastanza communala ò dumando alla pulizeia da far daple controllas davart las schliesas a motor.

Tinizong, igls 15 da november 2022                            Suprastanza communala Surses