Igl scumond absolut da far fi aint igl territori abitabel vign schlucco
Perveia dallas plievgias igls davos deis è igl prievel d’incendis an Surses sa sminuia. Perchegl vign lubia da grillar ordavert sen taragn privat aint igl territori abitabel. Sen dumonda an scretg pò la direcziun digl cumegn conceder ena lubientscha d’excepziun da grillar tar occurrenzas sen taragn public. I vign an mintga cass fatg appel all’atgna responsabladad.
La direcziun digl cumegn da Surses ò relaschea en scumond absolut da far fi e da vidar fis artifizials sen igl antier territori communal an Surses, er aint igl territori abitabel. Siva las plievgias digls davos deis e las temperaturas pi bassas è la situaziun sa schluccada en tant an Surses, aglmanc per igl mument. I vala pero da deir tgi uradis ed urezis redutgeschan igl prievel d’incendis angal per curt taimp. Igl è adegna da far adatg cun far fi! Tenor la lescha da gôt digl cantun Grischun ègl scumando venavant da far fis ordaifer igl territori abitabel, chegl vot deir tgi gl’è scumando da far fi aint igl gôt ed agl our digl gôt. A caschung dalla festa naziunala ègl er scumando da vidar fis artifizials (rachetas, vulcans, etc.). Igl scumond absolut da far fi e da vidar fis artifizials vala anfignen tg’el vign revoco.
Ulteriouras infurmaziuns e la valetaziun actuala dalla situaziun èn da cattar sen la pagina-web digl Uffezi da gôt e prievels dalla nateira digl cantun Grischun: www.gr.ch.
Tinizong, igls 29 da fanadour 2022 Direcziun cumegn da Surses