Decisiuns dalla radunanza communala Surses

La radunanza communala Surses digls 27 da zarcladour 2022 ò

• decidia unanimamaintg an connex cun igl rendachint 2021
  - da metter 2 milliuns francs ainten la prefinanziaziun (capital agen) per igl project «construcziun tgesa da scola primara nova a Savognin»; e
  - d’approvar igl rendachint 2021, tgi cumpeglia bilantscha, chint economic, chint d’investiziun, chint dalla circulaziun digls daners ed agiunta. Siva cudischaziun dalla prefinanziaziun menziunada soura per la scola sera igl rendachint cun en surple d’antradas da CHF 1’675’792. Las investiziuns bruttas montan a CHF 4’908’145 (investiziuns nettas CHF 4’034’360). Igl madem mument è nia do discargia agls organs ed allas collaboratouras e collaboratours responsabels;
• piglia cunaschientscha digls rendachints davart igls projects d’investiziun digl cumegn tgi èn nias terminos igl 2021;
• approvo unanimamaintg igl contract cun la Corporaziun Alp Faller davart la cessiun gratuita dallas parcellas nr. 9905 (part), nr. 9906, nr. 9911 e nr. 9923 (part) ainten la Val da Faller (Mulegns) agl cumegn da Surses;
• approvo unanimamaintg igl contract da servitut persunala cun la Corporaziun Alp Faller pertutgont la concessiun da dretgs publics an favour digl cumegn da Surses per passar a pe e cun vehichels sen las veias dallas parcellas nr. 9905, nr. 9908 e nr. 9923 (cun excepziun dallas surfatschas tgi èn neidas cedeidas tenor tractanda precedenta) ainten la Val da Faller (Mulegns);
• decidia unanimamaintg da betg acceptar la moziun tgi è neida inoltrada cun la fegnameira da migliurar la participaziun politica sen scalem communal. Chegl cugl argumaint tgi la suprastanza ò gio previa diversas maseiras correspondentas aint igl rom dalla revisiun dalla constituziun communala;
• piglia cunaschientscha dallas infurmaziuns davart igl sboz dalla nova lescha da sepultura e santieri digl cumegn da Surses. Las votantas ed igl votants on ossa la pussebladad d’inoltrar alla suprastanza giaveischs e propostas anfignen la fegn da fanadour 2022;
• piglia cunaschientscha da diversas infurmaziuns digl cumegn.

Igl protocol dalla radunanza communala digls 27 da zarcladour ò da neir publitgia igl pi tard en meis siva la radunanza cun en termin d’exposiziun da 30 deis. Igl termin d’exposiziun exact vign communitgia a taimp util aint igls figls uffizials digl cumegn.

Tinizong, igls 27 da zarcladour 2022                           Suprastanza communala Surses