Radunanzas communalas Surses - coordinaziun per pussebladad da transport

Igls 7 da favrer 2022 vign salvada la proxima radunanza communala a Savognin. L’invitaziun cun la glista da tractandas è neida tarmessa a tot las persungas cun dretg da votar.

Da vart dalla populaziun è nia intimo diversas gedas, tg’igl cumegn duess organisar mintgamai igl transport per las votantas ed igls votants dallas otras vischnancas tgi vottan sa participar allas radunanzas communalas a Savognin.

La suprastanza ò decidia da renunztgier all’organisaziun d’en tal transport. L’experientscha ò musso tgi igl «ageid da bunga vischinanza» funcziunescha per schort bagn aint igl noss cumegn e tgi la gliout è bunga da s’organisar sezza per igl viadi a Savognin alla radunanza communala ed anavos. Per cass tgi vess da dar tuttegna persungas tgi on nigna pussebladad da far igl viadi a Savognin, amprova igl cumegn da coordinar igl viadi an cuminanza.

Nous supplitgagn perchegl las persungas tgi on basigns d’en transport resp. las persungas tgi on plaz da piglier anc ensatgi cun els aint igl auto, da s’annunztgier mintgamai igl de dalla radunanza communala anfignen las 12.00 tar l’administraziun communala (telefon
081 659 11 60). Nous ischan premuros da coordinar igl viadi alla radunanza communala, schinavant tgi dat annunztgas da persungas tgi porschan la pussebladad da carar an cuminanza. Chella purscheida monta dantant betg, tg’igl cumegn seia obliia da porscher ena pussebladad da carar. L’organisaziun per sa participar alla radunanza communala resta venavant tgossa da mintga singula votanta e da mintga singul votant.

Nous supplitgagn da piglier cunaschientscha ed angraztgagn anticipadamaintg per la prontadad da porscher la pussebladad da transportar otras persungas cun auto alla radunanza communala.
 

Tinizong, igls 02-02-2022                                     
Suprastanza communala Surses