Communicaziun allas medias davart las elecziuns communalas 2021

Surses: La nova suprastanza communala è eligeida.
Las votantas ed igls votants digl cumegn da Surses on eligia Irene Kolb scu nova commembra dalla suprastanza communala e confirmo igl suprastant d’anfignen ossa Romeo Poltera an sies uffezi. Pinavant è nia eligia Lothar Künzli scu nov commember dalla cumischung da gestiun. Las elecziuns èn neidas fatgas all’urna.

Irene Kolb da Savognin è neida eligeida cun 415 vouschs da nov ainten la suprastanza communala. Igl suprastant d’anfignen ossa Romeo Poltera da Savognin è nia confirmo an sies uffezi cun 294 vouschs. Els dus èn eligias per la perioda d’uffezi 01-01-2022 anfignen igls 31-01-2025. A parteir digl schaner 2022 sa cumpona la suprastanza communala damai scu suonda: Leo Thomann, mastral (actual) cun igls quatter commembers Adrian Ballat (actual), Irene Kolb (nov), Romeo Poltera (actual) e Giancarlo Torriani (actual).
Las elecziuns communalas èn stadas necessarias perveia dalla midada digl nov modus d’elecziun digls commembers da suprastanza. Da nov vignan las commembras ed igls commembers da suprastanza eligias an etappas ed an en turnus da mintgamai dus onns.

Per l‘elecziun cumplementara ainten la cumischung da gestiun èn stos a disposiziun dus candidats. Cun 366 vouschs è nia eligia Lothar Künzli da Savognin. Igl sies cuntercandidat Ursus Sonder da Salouf ò obtignia 246 vouschs.
Chell’elecziun cumplementara è stada necessaria perchegl tg’igl commember d’anfignen ossa, Marco Jäger da Sur, è sa retratg per muteivs professiunals durant la perioda d’uffezi currenta sen la fegn digl onn.

La participaziun all’urna è stada tar stgers 35%.

Tinizong, igls 26-09-2021    

Per infurmaziuns ulteriouras stat a disposiziun Leo Thomann, mastral (e-mail: leo.thomann@surses.ch, telefonign 079 405 96 73)