Decisiuns dalla radunanza communala Surses digls 30 d'avost 2021

La radunanza communala Surses digls 30 d’avost ò

  • approvo unanimamaintg igl credit d’impegn da fr. 400'000.00 per realisar la fixaziun dalla plazza da rimnada e zavrada Gneida a Salouf. Igl madem mument è la suprastanza communala neida incumbensada cun l’execuziun.
  • approvo cun 129 cunter 4 vouschs igl credit d’impegn brut da fr. 760'000.00 per realisar igl Parc Ela Trek «Tgamona da Set». Igl madem mument è la suprastanza communala neida incumbensada cun l’execuziun.
  • accepto cun 133 vouschs e nigna cuntervousch la revisiun parziala dalla planisaziun locala pertutgont la zona d’industreia Gravas a Tinizong. Ossa succeda l’exposiziun publica da recurs correspondenta.
  • decidia cun 130 vouschs cunter 1 vousch da vender agls conjugals Christa e Stefan Hungerbühler da Cunter la parcella da biagier nr. 8260, Davos-Clavo, Salouf. La vendita succeda sen basa digl reglamaint digl anteriour cumegn da Salouf pertutgont la vendita e la cunsigna da taragn an dretg da biagier a Davos-Clavo e La Gneida.
  • approvo cun 128 cunter 3 vouschs la lescha da carar sen veias da fons, prada, gôt ed alps digl cumegn da Surses cun ena midada digl art. 7 alinea 1 lit. a. Cun chella midada vignan concedeidas max. treis lubientschas e tottas treis èn transferiblas. L’antrada an vigour dalla lescha vign publitgeida da maniera uffiziala, siva tgi la signalisaziun correspondenta è fatga.
  • piglia cunaschientscha da diversas infurmaziuns digl cumegn.

Igl protocol dalla radunanza communala digls 30 d’avost ò da neir publitgia igl pi tard en meis siva la radunanza cun en termin d’exposiziun da 30 deis. Igl termin d’exposiziun exact vign communitgia a taimp util aint igl figl uffizial digl cumegn.

Tinizong, igls 30 d’avost 2021    Suprastanza communala Surses

 

  Mussar tot las novitads