Annullaziun digl obligatori da purtar mascrignas da protecziun an lis determinos a Savognin ed a Beiva

Las maseiras relaschedas digl cumegn da Surses da stueir purtar mascrignas da protecziun an lis bagn frequentos a Savognin e Beiva vignan annulladas per dalunga. Oter tgi spitgia ò l’experientscha musso tgi gl‘ò betg do folas da gliout per lung digl Stradung a Savognin ed aint igl center da vischnanca a Beiva.

Igl december veva igl stab directiv digl cumegn da Surses relaschea en obligatori da purtar mascrignas da protecziun per lung digl Stradung a Savognin ed aint igl center da vischnanca a Beiva davent dalla farmada da posta e davent digl hotel Post anfignen tar ils runals. Chel obligatori vign annullo cun effect immediat. Igl obligatori da purtar ena mascrigna da protecziun agl interiour da tot igls bietgs e stabilimaints accessibels agl public, agl exteriour da stabilimaints e d’affars inclus fieras, scu er an sectours da spetga da bus e da pendicularas e tar las farmadas digl traffic public resta pero an vigour.

Da prancepi vala sen venavant: purtar adegna ena mascrigna da protecziun, schi gl’è betg pussebel da tigneir aint ena distanza dad 1.5 meters tar en’otra persunga u schi gl’è betg avantmang ena protecziun fisica. Cun protecziun fisica è managea p.ex. ena pare da separaziun. Cun purtar la mascrigna aint igl mintgade vignan schurmagedas cunzont las otras persungas.

Igl obligatori da purtar mascrignas da protecziun vala per persungas davent da 12 onns. La responsabladad persunala dalla populaziun e digls giasts, scu er igl respect vicendevel è igl punct central. La populaziun ed igls giasts an Surses èn dumandos d‘observar las maseiras per tigneir aint las distanzas e las prescripziuns da higiena.

Infurmaziuns:

Leo Thomann, mastral (e-mail: leo.thomann@surses.ch, Tel. 079 405 96 73)

Tinizong, igls 09-02-2021

  Mussar tot las novitads