INVITAZIUN ad en luvratori - model directiv Surses 2030

INVITAZIUN
ad en luvratori - model directiv Surses 2030 
sonda, igls 31 d’otgover 2020, dallas 13.30 allas 17.30,
an sala Grava a Savognin

Stimadas abitantas, stimos abitants
Stimadas e stimos possessours da sagondas abitaziuns an Surses

An connex cugl process participativ pigl model directiv «Surses 2030» lainsa elaborar ansemen cun la populaziun - cun indigens e sagond-indigens - ena visiun e las lengias directivas pigl noss cumegn da Surses.

Lez Vous furmar da moda activa igl avigneir digl noss cumegn e da nossa belezza val Surses? Alloura ans legrainsa zont fitg da Vossa participaziun.

Ansemen cun Vous lainsa sviluppar ena visiun e las maseiras correspondentas concernent las tematicas suandontas:

  • administraziun (finanzas, structuras, process)
  • turissem (pendicularas, hotellareia, parahotellareia, taimp liber, Origen, Parc Ela,
  • plazzas da sport)
  • infrastructura e siertad publica (planisaziun da construcziun, planisaziun digl territori, provedimaint e dismessa, organisaziuns d’intervenziun d’urgenza)
  • abitar e furmar (attractivitad, sagond-indigens, maletg da vischnanca, identitad, solidaritad)
  • economia (commers e mastranza, agricultura ed economia forestala, digitalisaziun)
  • ambiaint e nateira (persistenza, energeia, ava, mobilitad)
  • furmaziun e cultura (scolas, furmaziun e perfecziunamaint, lungatgs, usits)
  • fatgs socials e sanadad (giuventetna, famiglias, «neir vigl»)

Intervista online

Schi Vous na savez betg esser preschaint igls 31 d’otgover 2020, pudez far a saveir igl Voss aveis pi tard a caschung d’ena retschertga online. Ulteriouras infurmaziuns davart chella retschertga suondan a taimp util.

Annunztga

Per saveir organisar igl luvratori conform allas prescripziuns da Covid-19,

Az supplitgainsa da s’annunztgier anfignen igls 25 d’otgover 2020.

Vous pudez s’annunztgier per telefon durant igls taimps d’avertura digl spurtegl dall’administraziun communala: telefon 081 659 11 60.

Infurmaziun coronavirus

Igl concept da schurmetg vign elaboro sa basond allas annunztgas. Mascrignas da protecziun e med da desinfectar vignan mess a disposiziun.

La suprastanza communala ed igl team da project sa legran d’ena numerousa participaziun.

Tinizong, igls 14 d’otgover 2020                     

SUPRASTANZA COMMUNALA SURSES

 

  Mussar tot las novitads