Decisiuns dalla radunanza communala digl cumegn da Surses digls 27 da november 2017

La radunanza communala digls 27 da november 2017 ò

  • approvo cun gronda pluralitad e sainza cuntervousch igl protocol dalla radunanza communala digls 21 d’avost 2017.
  • approvo cun 127 cunter 1 vousch igl preventiv digl chint da gudogn e sperdita pro 2018 tgi prevei en surple d’antradas da 1'581'300.00 fr.
  • approvo cun 115 cunter 2 vouschs igl preventiv digl chint d’investiziun pro 2018 tgi prevei investiziuns bruttas da 9'146’0000.00 fr. Las investiziuns nettas montan a 7'036'000.00 fr.
  • approvo cun 116 cunter 9 vouschs igl credit d’impegn da total 950'000.00 fr per gl’angrondamaint e l’equipaziun dalla deponia Davos Fallung a Savognin (realisaziun an 2 etappas igl 2018 e 2019) ed incumbenso igl madem mument la suprastanza cun l’execuziun digl project.
  • approvo cun 130 vouschs e sainza cuntervousch igl credit da budget da 270'000.00 francs per la sanaziun dalla veia cantunala Rona Soura, Rona - Rona Soura (4. etappa) ed incumbenso igl madem mument la suprastanza cun l’execuziun digl project.
  • approvo cun 112 cunter 8 vouschs igl contract da dretg da biagier cun la Nova Fundaziun Origen pertutgont l’anterioura tga communala a Riom. Igl contract vign fatg per ena dirada da 30 onns ed en tschains da 1'000.00 fr. ad onn.
  • decidia cun 129 cunter 1 vousch da cassar per data dalla decisiun la lescha da vitturigns digl anteriour cumegn da Savognin.
  • fixo cun 128 vouschs e nigna cuntervousch igl pe da taglia per igl onn 2018 sen 100% dalla taglia cantunala simpla.
  • fixo cun 127 vouschs e nigna cuntervousch la quota per la vendita dad immobiglias ad esters pigl onn 2018 sen 100%.
  • piglia cunaschientscha da diversas infurmaziuns.

Igl protocol dalla radunanza communala digls 27 da november vign exponia a parteir digls 11 da december 2017 an canzleia communala a Tinizong. Tottas persungas cun dretg da votar an tgossas communalas pon piglier invista digl protocol.

Tinizong, igls 28 da november 2017                           La suprastanza communala Surses

  Mussar tot las novitads