Salouf

Cumegn da Salouf
Cumegn da Salouf

Igl nom dalla vischnanca da Salouf dereiva digl cavalier Salugo, tgi vign numno igl onn 1160 scu administratour d'ena gronda curt episcopala.

Anfignen igl onn 1943 niva duvro uffizialmaintg igl nom tudestg Salux. La culegna sarrada è situada digl mang sanester dalla val Surses sen ena otezza sur mar da var 1250 m. Sen la veia vers Mon sa catta la pitschna culegna Del e sot la vischnanca la curt Mulegn. La voba consista da treis steilas ed ena gelgia d'argient tgi ranviescha alla famiglia Fontana. Da chella famiglia dereiva igl erox grischun Banadetg Fontana.

Salouf posseda blers bagns culturals, tgesas imposantas e per part ornadas cun sgrafit furman igl maletg dalla vischnanca. En'attracziun è er igl pastregl tgi datescha digl 18avel tschentaner e tgi è nia renovo da nov. Igl mulegn vigl or digl onn 1877 è anc bagn mantignia e vala scu egn digls mulegns da grang tgi èn stos an travagl igl pi dei, numnadamaintg anfignen la mesadad digls onns 1990. La baselgia da Son Gieri è neida biagieda anturn igl 1500. Igl altar grond or digl taimp anturn 1515 è remarcabel. Sot Salouf sen igl intschess Flecs sa catta ena fundareia. Mademamaintg segl territori da Salouf schea Ziteil, cun en'otezza sur mar da 2429 meters igl pi ot li da pelegrinadi da l'Europa.

Documaints

Tscharne ena categoria

Sorteir