Mulegns

Cumegn da Mulegns
Cumegn Mulegns

Mulegns schea ainten la stretga dalla val alla confluenza dallas avas da Faller e Gelgia. La vischnanca è situada sen ena otezza da stgers 1500 meter sur mar. La veia digl Gelgia sa squitscha tras las retschas da tgesas.

Mulegns era dasperas Curvalda e Casti igl terz li, nou tgi niva mido igls tgavals. Anfignen 150 tgavals cattavan plaz ainten las grondas stallas. Igl marcant otel Liun anmez vischnanca stat anc oz scu monumaint pigls taimps da posta da carotscha tgi èn gio dadei passos. Siva da l'avertura dalla lengia da veiadafier Alvra òn igls ples digls abitants da Mulegns pers lour basa d'existenza; chel fatg ò er gia consequenzas pigl andomber d'abitants. Anturn igl 1900 abitavan ca. 150 persungas a Mulegns, oz èn chegl pi pacas tgi 30.  

La baselgia barocca da Son Francestg datescha digl onn 1643. Perveia da diversas arsas da vischnanca existan agls Mulegns strousch ple actas istoricas. I vign supponia tgi igl nom Mulegns dereiva d'en travagl da Mulegn agl ual da Faller. La Voba cuntigna ena roda-mulegn neira sur ondas blavas tgi simboliseschan igl ual da Faller. Anfignen igl onn 1943 niva duvrada uffizialmaintg la versiun tudestga Mühlen. Igl anteriour cumegns da Mulegns è nia fundo digls Gualsers aint igl 15avel tschentaner ed igl 1521 vign Mulegns menziuno per l'amprema geda. Igl center uriund dalla colonisaziun era dantant ainten la val Faller. Lò niva exploto arom da ca. 600 anfignen 500 avant Cristus ed i dava furns da livantar. Igls Gualsers eran colonisos a lò gio aint igl 13avel tschentaner. Scu possess episcopal è Faller numno per l'amprema geda igl 1315.