Protecziun dalla populaziun

Per dominar situaziuns spezialas ed extraordinarias è igl stab directiv communal incumbenso tenor lescha davart la protecziun dalla populaziun da

  • previgneir ed orientar la populaziun,
  • proteger la populaziun, valours materialas ed igl ambiaint,
  • minimar donns,
  • refar schi spert scu pussebel la situaziun normala.

Evacuar la populaziun pertutgeida

Alarm d’ava

Igl «alarm d’ava» è en cumond d’evacuar immediat igl territori an prievel sot en meir da fermada. Igl «alarm d’ava» vign duvro angal an territoris periclitos sot en meir da fermada. Igl «alarm d’ava» sa furma da dodesch tungs bass, tgi cozzan mintgamai 20 secundas, an intervals da 10 secundas. Tunga igl «alarm d’ava», stò la populaziun

  • bandunar immediat igl territori an prievel,
  • suandar las reglas da figls d’infurmaziun e suandar igls cumonds dallas autoritdas.

Daple infurmaziuns cattez ainten igls downloads «territoris an prievel» e «spazis da spitgier sieirs» alla fegn da chel artetgel.

Alarm general

En tung da sirena tgi vo regularmaintg ad ot ed a bass è igl «alarm general». Chel tung d’avertimaint cozza tar sirenas staziunaras ena minuta e vign repetia ainfer tschintg minutas. Igl «alarm general» vign activo sch’igl è pussebel tgi la populaziun è an prievel. Chel tung annunztga directivas da cumportamaint u annunztgas uffizialas tgi vignan dadas ancunaschaintas antras igl radio.

Per la populaziun monta igl «alarm general»:

  • tadlar radio e s’infurmar via Alertswiss,
  • suandar igls cumonds dallas autoritads,
  • infurmar las vaschignas ed ils vaschigns.

Sarvetsch communal d’infurmaziun per SMS

Mintga mument pò igl cumegn – u parts digl cumegn – esser an prievel da catastrofas u situaziuns d’urgenza da nateira, tecnicas u caschunadas dalla societad. Sche la populaziun è an tals cass concretamaintg an prievel, è igl post da communicaziun responsabel per igl alarm e la derasaziun da directivas da cumportamaint. Igl cumegn da Surses dovra per chel scopo scu instrumaint da communicaziun en sarvetsch da SMS gratuit per pudeir infurmar la populaziun an cass d’evenimaints cun cumonds da cumportamaint.

Igl sarvetsch funcziuna suandontamaintg:

Activar igl sarvetsch dad SMS

Tarmatte cun igl Voss telefonign alla nomra 076 601 22 55 igl text sequent:

  • START 7453Surses

Deactivar igl sarvetsch dad SMS

Schi Vous lez deactivar igl sarvetsch d’infurmaziun gratuit, tarmatte alla nomra 076 601 22 55 igl text sequent:

  • STOP 7453Surses

D’infurmar la populaziun an cass d’evenimaints cun cumonds ed instrucziuns da cumportamaint, è ena maseira d’urgenza. An cass d’evenimaints survignan las utilisadras ed igls utilisaders automaticamaintg en SMS.

Hotline per la populaziun

Situaziuns extraordinarias fon neir malsieir, perchegl ò la qualitad da communicaziun en’ota muntada durant las ampremas ouras ed igls amprems deis. Igl cumegn da Surses stò esser abel d’installar an terma da curt taimp en telefon da hotline per la populaziun e saveir cunsiglier. An cass d’evenimaints cun bleras dumondas dalla populaziun peglia persunal scolo ancunter igls telefons, infurmescha ed elavurescha immediat las infurmaziuns.

An cass d’evenimaints e tenor ordinaziun dallas autoritads vign installo en telefon da hotline: +41 81 659 11 72

Post da communicaziun

Ena communicaziun da crisa bunga e cuntinuada è impurtanta per la credibladad dallas infurmaziuns communalas, per rinforzar la cunfidanza dalla populaziun, per impedeir malancletgas e per intermediier saveida. Igl mastral ò la responsabladad suprema per la communicaziun cumpletta. Igl mastral, ansemen cun igl canzlist scu manader operativ, èn responsabels per la communicaziun interna ed externa.

  • Igl post da stab, canzleia communala, è igl post central digl cumegn da Surses er per dumondas dallas medias u dumondas da persungas tgi ston neir raspundeidas dalla suprastanza communala u digl mastral.

Post da communicaziun 
Telefon.: +41 81 659 11 64
Telefonign: +41 78 751 23 94
E-Mail: communicaziun@surses.ch

Diese Seite verwendet Cookies. Erfahren Sie in unserer Datenschutzerklärung mehr darüber, wie wir Cookies einsetzen und wie Sie Ihre Einstellungen ändern können.