Menaschi forestal

Igl menaschi forestal digl cumegn da Surses è responsabel per tot las lavours digl gôt. Chegl cuntigna tranter oter la tgira digl gôt saro e digl gôt gioven, la fundaziun digl effectiv e la promoziun dalla biodiversitad. Ultra da chegl surstat agl menaschi forestal la survigilanza dallas avas tgi corran, rampars da ragns e paralavegnas.

Gôt Surses

En gôt bagn structuro sa distingua antras l’existenza da tottas vigliadetnas ed ena gronda diversitad da speztgas. Per mantigneir e promover chegl, è la tgira digl gôt indispensabla. Las selvas digl cumegn da Surses s’extendan tras l’antiera val da Salouf anfignen Beiva. La planta principala è igl pegn, scu plantas lateralas  vignan avant lareschs, tievs e schembers. Sen intschess pi bass digl cumegn e dasperas las avas, sa cattan er plantas da figlia. La surfatscha da gôt productiva monta 5‘226 hectaras, da chellas èn 3‘030 hectaras scartadas scu gôt saro. Igl gôt saro schurmegia veias, vischnancas, bietgs ed otras infrastructuras cunter prievels dalla nateira, scu per exaimpel lavegnas, bovas, avas grondas e crudada da crappa. Igl antier gôt è certifitgia cun FSC®

Prestaziuns da sarvetsch

Cunsegliaziuns forestalas

Nous Az cunsigliagn gugent an fatgs forestals. Seia chegl ena cunsegliaziun cumpetenta per igl gôt privat, per amplantaziuns, la vendita da lenna u maseiras per la qualitad dalla cuntrada.

Lenna dad arder

Nous Az offerign lenna da pegn e da laresch. La lenna pò neir retratga directamaintg dasperas la veia da gôt ed an lunghezza givischeida, madiera u sfandia, e vign er furneida sen giaveisch tar Vous a tgesa. Per l’ampustaziun amplaniz p.pl. igl formular d’ampustaziun u contactez nous aint igl luvratori forestal a Tinizong.

Lavours da lennareia

Lez Vous far en tagl da lenna, na vez pero betg fatg la scolaziun necessaria u vez betg avonda taimp u igl equipamaint persiva? Nous Az offerign gugent en sarvetsch cumplet e professiunal, tgi cuntigna la cunsegliaziun, igl nudar las plantas e la vendita dalla lenna.

Lavours per terzs

È igl Voss bustgom u la planta ainten iert neida mengia gronda? Lez plantar plantas u tgaglias indigenas ainten iert? Betg esite e dumande a nous ena offerta nunlionta.