Taglia cantunala e federala 2016

D’inoltrar ena declaraziun da taglia èn oblieidas

      persungas naturalas sch’ellas:

      a) on lour domicil u lour dimora da dretg fiscal aint igl cantun. Ena persunga ò la dimora da dretg fiscal,     

           sch’ella resta, malgro interrupziuns temporaras,

          -   durant aglmanc 30 deis e lavoura an Svizra;

          -   durant aglmanc 90 deis sainza aveir ena lavour an Svizra.

      b) èn purtaders, partenaris u galdeiders da menaschis commerzials aint igl cantun Grischun;

      c) on en luvratori aint igl cantun;

      d) èn possessours, on en dretg da gioldamaint u dretgs sumigliants ve da schaschant aint igl cantun;

      e) fon commers u intermedieschan schaschant aint igl cantun;

      f) practitgeschan en’activitad persunala aint igl cantun e survignan per chegl ena indemnisaziun.


Termin per inoltrar la declaraziun da taglia

 Per inoltrar la declaraziun da taglia èn da risguardar igls suandonts termins:

31 da mars 2017 per persungas cun activitad da gudogn dependenta, scolars e students maiorens, pensiunos, disoccupos.

30 da settember 2017 per persungas cun activitad da gudogn independenta, societads simplas e persungas domicilieidas ordvart igl cantun cun interpresas aint igl Grischun.

30 da settember 2017 per persungas domicilieidas ordvart igl cantun cun immobiglias aint igl cantun Grischun (obligaziun limitada da paer taglia).


Li per inoltrar la declaraziun da taglia

A parteir dalla perioda da taglia 2016 n’èn las declaraziun da taglia betg ple d’inoltrar agl uffezi da taglia digl cumegn, mabagn da nov all‘administraziun da taglia cantunala cun l’adressa suandonta:

Administraziun cantunala da taglia GR,  Center d‘elavuraziun/CU, Steinbruchstrasse 18, 7001 Cuira


Prolungaziun digl termin

A parteir dalla perioda da taglia 2016 on las dumondas per prolungaziun digl termin da neir inoltradas avant la scadenza digl termin d’inoltraziun centralmaintg a la

Administraziun cantunala da taglia GR, Dumondas da termin/CU, Steinbruchstrasse 18, 7001 Cuira

 fristgesuche@stv.gr.ch

Las dumondas da prolungar igl termin èn d’inoltrar cun las indicaziuns suandontas: nomer cumplet digl register (incl. nomer digl cumegn), nom, prenom e cumegn da domicil.  

Las dumondas da prolungar igl termin pon neir inoltradas online, per e-mail u an scretg. ONLINE: http://www.stv.gr.ch

Igls termins concedias na vignan betg confirmos e da prancepi na pon els betg neir prolungos. An cass singuls e mutivos pò excepziunalmaintg neir dumando en ulteriour termin.


Schi la declaraziun da taglia n’è betg neida consigneida na dispensescha chegl betg dall’obligaziun d’inoltrar la declaraziun da taglia ainfer igl termin menziuno soura (art. 127 LT). Tgi tgi n’ò betg survagnia igls formulars pò pretender chels da tot taimp dall’administraziun da taglia communala u dall’administraziun da taglia cantunala a Coira.


Conjugals sottascreiven communablamaintg la declaraziun da taglia

Conjugals tgi veivan giuridicamaintg ed effectivamaintg an ena  lètg nunseparada èn sottamess communablamaintg alla taglia. Las antradas e la facultad vignan summadas sainza risguardar igl stadi digls bagns. Tots dus conjugals èn da madema posiziun an la procedura e sottascreivan communablamaintg la declaraziun da taglia.

Schi la declaraziun da taglia è neida sottascretga sulettamaintg d’en conjugal, survign l’oter conjugal en termin. Siva la scadenza da chest termin vign supponeida la represchentaziun cun contract tranter igls conjugals (art. 123a LT, art. 131 al. 2 LTFD).

Per la declaraziun da taglia 2016 vala scu termin general da rectificaziun dalla sottascripziun digl conjugal igls 30 d’avregl 2017; per declaraziuns da taglia tgi vignan inoltradas pi tard vign concedia en termin da rectificaziun dalla sottascripziun da 20 deis.

  Mussar tot las novitads