Construcziun nova dalla tgesa da scola Grava

Igl nov stabilimaint da scola Grava a Savognin stat curt avant la finiziun uscheia tg'ins pò scumanzar cun igl menaschi da scola tenor plan igl avost 2026. La midada aint igl nov bietg vign fatga la fegn fanadour / antschatta avost. La scola sa legra d'ena infrastructura moderna, locals generous e cundiziuns d'instrucziun conformas agl taimp per scolaras e scolars scu er per las persungas d'instrucziun. Mademamaintg nign nous a pudeir porscher ena structura digl de conform agl taimp.

Perveia d'annadas extraordinariamaintg grondas stat durant igl amprem onn da menaschi temporarmaintg betg a disposiziun avonda plaz per tot las classas. Perchegl vign la 6avla classa primara instrueida igl onn da scola 2026/27 venavant aint igl provisori a Naloz. Cun chella schliaziun savagn nous evitar da stueir scasar ples gedas e tigneir igls costs organisatorics e finanzials schi bass scu pussebel.

La situaziun actuala è d'attribueir a fluctuaziuns tar igl domber da scolaras e scolars e vign a sa schluccar puspe a media vista. An futur vign chinto puspe cun annadas pi pitschnas, uscheia tgi las capacitads dalla nova tgesa da scola tanschan.

An futur vignan manadas la scola primara e la scoletta aint igl stabilimaint da scola Grava, dantant tg'igl scalem superiour resta venavant ainten la tgesa da scola Barnagn. L'avertura uffiziala dalla nova tgesa da scola Grava ò li venderde, igls 28 d'avost 2026 e porscha alla populaziun la caschung da piglier invista digl nov stabilimaint.

La scola ed igl cumegn da Surses èn persvadias d'aveir stgaffia cun igl nov stabilimaint da scola ena schliaziun persistenta ed orientada agl futur.