Igls noss unfants e giuvenils duessan dastgeir sa participar activ a tot igls affars tgi pertotgan er els. Scu amprema maseira èn nias fundos dus cunsegls da scolars, igl «cunsegl d’unfants Grava» ed igl «cunsegl gioven».

Igl cumegn da Surses sa participescha agl project «participaziun d’unfants e giuvenils aint igls cumegns Grischuns» da jugend.gr, l’uniun tetgala per la promoziun d’unfants e giuvenils aint igl cantun Grischun. Cun chel project less igl cumegn dar ena vousch agls unfants e giuvenils da Surses.

Visiun digl project è da lascher sa participar igls unfants a tot igls affars tgi pertotgan er els. Els duessan purtar aint, sviluppar e realisar lour ideias e giaveischs e furmar uscheia activ lour avigneir.

NOUS. TOTS. ANSEMEN.

Igl project participaziun da giuvenils corresponda allas fegnameiras digl maletg directiv Surses 2030 per daple cogestiun e participaziun da vart dalla populaziun scu er la realisaziun digl label UNICEF «cumegn amicabel per unfants».

Per la elaboraziun digl maletg directiv Surses 2030 on igls scolars dalla 5avla classa primara anfignen la terza superioura dastgea numnar la premaveira 2021 lour giaveischs, basigns ed ideias. Aint igl rom digl project participaziun da giuvenils èn nias piglias ancunter la fegn digl onn er igls giaveischs digls scolars e dallas scolaras dalla scoligna anfignen la 4. classa primara. Las ideias rimnadas duessan neir priorisadas durant igls proxims meis ansemen cugls unfants e giuvenils e neir piglias se ainten en plan d’acziun, scu er neir realisos zap per zap.

Igl project vign mano tras an incumbensa digl cumegn da Surses e palo dalla gruppa da manar. Alla gruppa da manar fon part Giancarlo Torriani ed Adrian Ballat (suprastants), Thomas Eigensatz (assistent da giuvenils & represchentant da genitours), Zegna Pittet (represchentanta per scolast*as e genitours) e Linda Netzer (sviluppadra digl li & represchentanta da genitours). Da vart da jugend.gr accumpogna Chantal Bleiker igl project.

Igls cunsegls da scolars on gio antschet cun lour lavour. D’ena vart èn els sa decidias pigls noms digls cunsegls, da l’otra vart on els fatg partratgs ansemen cun lour conscolars pertutgond la nova tgesa da scola primara. Igl video tgi è sa resulto ordlonder vign ad esser la basa da lavour pigls architects.

Pigl mument vign mano tras ena concurrenza d’architectura per la construcziun dalla nova tgesa da scola primara. Igls projects dalla concurrenza vignan preschentos alla populaziun igl zarcladour 2022 (ulteriouras infurmaziuns tar la construcziun dalla tgesa da scola).

Scu ulterioura activitad prioriseschan igls cunsegls da scolars projects, tgi els peglian ainta mang sezs u tgi els lessan sustigneir. Temas scu disco da scolars, kiosk da scola, pero er miglras colliaziuns digl traffic public ainten las vischnancas u er igl avigneir dalla stanza da giuvenils vignan discutos energicamaintg. Otras acziuns antras igls cunsegls da scolars vignan a suandar durant igl onn. Igls unfants e giuvenils sursetters èn mutivos e pronts da furmar activ lour avigneir.

L’iniziativa «cumegn amicabel per unfants» sa basa sen l’iniziativa internaziunala UNICEF «Child Friendly Cities». Ella promova intenziuno process per augmentar l’amicabladad per unfants ed accumpogna cumegns, da fixar practic scu er strategic la convenziun per dretgs d’unfants.

Aint igl rom dall’iniziativa realiseschan cumegns participos igls suandonts zaps, per survagneir igl label da process «cumegn amicabel per unfants» :

• Definiziun dall’atgna posiziun (vista dalla instanza e digls carschias)
• Workshops cun unfants e giuvenils (vista digls unfants)
• Plan d’acziun
• De d’evaluaziun (vista externa)